Almatyda ınvestorlardyń quqyǵy qorǵalyp, 1,6 trln teńgesi saqtaldy
ALMATY. KAZINFORM – Almatyda qalalyq prokýratýranyń uıymdastyrýymen «Investorlardyń quqyqtaryn qorǵaý jónindegi sharalar jáne ınvestıtsııalyq ombýdsmenniń róli» taqyrybynda forým ótti.
Talqylaýǵa Bas prokýratýranyń Investorlardyń quqyqtaryn qorǵaý komıtetiniń tóraǵasy Baýyrjan Eraly, qala prokýrory Serik Káripbekov, Almaty ákimi Darhan Satybaldy, memlekettik organ ókilderi, sondaı-aq 100-den astam ınvestor men kásipker qatysty.
Forým barysynda ınvestıtsııalyq jobalardy súıemeldeý jáne bıznestiń quqyǵyn qorǵaý máseleleri qaraldy. Qala prokýratýrasynyń málimetinshe, Almatyda problemasy bar 75 keıs sheshilip, jalpy quny 1,6 trln teńgeden asatyn 194 ınvestordyń quqyǵy qorǵalǵan. Jobalardy iske asyrý nátıjesinde 24 myńǵa jýyq jumys orny quryldy.
Komıtet tóraǵasy Baýyrjan Eraly turaqty ınvestıtsııalyq klımattyń negizgi faktory – ınvestorlardyń zań ústemdigine degen senimi ekenin aıtty.
– Turaqty ınvestıtsııalyq klımattyń negizi – bul ınvestorlardyń óz quqyǵyn qorǵaý júıesine jáne zań ústemdigi qaǵıdatyna degen senimi, - dedi Komıtet tóraǵasy.
Ol Investorlardyń quqyqtaryn qorǵaý komıteti Memleket basshysynyń tapsyrmasymen qurylǵanyn atap ótti. Bas prokýratýranyń bul qurylymy — jaı ǵana qaǵaz júzindegi qadaǵalaý organy emes, bıznesti qorǵaýdyń pármendi quqyqtyq mehanızmi. Negizgi quraldardyń qatarynda «prokýror súzgisi», ınvestıtsııalyq jobalardyń tsıfrlyq monıtorıngi jáne olardy iske asyrýdyń barlyq kezeńinde quqyqtyq súıemeldeý atap ótildi.
Baýyrjan Eralynyń aıtýynsha, «prokýrorlyq súzgi» mehanızmin engizý bızneske jasalatyn negizsiz ákimshilik qysymdy toqtatýǵa, tekserýler men sot daýlarynyń sanyn azaıtýǵa, sondaı-aq kásipkerler qaýymdastyǵynyń senimin arttyrýǵa múmkindik berdi.
– Investorǵa qatysty birde-bir tekserý, aıyppul nemese talap aryz prokýrormen kelisilmeıinshe zańdy kúshine ıe bolmaıdy. Bul – adal bıznesti qorǵaýdyń tıimdi quraly, - dep atap ótti Baýyrjan Eraly.
Tsıfrlandyrý máselesine de erekshe kóńil bólindi. Ulttyq tsıfrlyq ınvestıtsııalyq platformany engizý aıasynda jobalarǵa onlaın-monıtorıng júrgizilip, táýekelder men kedergilerdi erte kezeńde anyqtaýǵa jaǵdaı jasaldy. Bolashaqta problemalardy boljaý jáne aldyn alý úshin jasandy ıntellekt quraldaryn paıdalaný josparlanyp otyr.
Sonymen qatar, tóraǵa Komıtet janynan medıatsııa ortalyǵyn qurý jospary týraly habarlady. Jańa alań ınvestorlar men memlekettik organdar arasyndaǵy daýlardy sotqa deıingi tártippen jedel retteýge múmkindik beredi.
Qala prokýrory Serik Káripbekov ınvestorlardyń quqyqtaryn qorǵaý jáne bıznes júrgizý úshin turaqty jaǵdaı qalyptastyrý qadaǵalaý organdary jumysynyń basym baǵyty bolyp qala beretinin atap ótti.
Almaty ákimi Darhan Satybaldy 2026 jyly 7 mlrd AQSh dollarynan astam ınvestıtsııa tartý josparlanǵanyn aıtty. Joǵary qosylǵan quny bar, jańa jumys oryndaryn ashatyn jáne zamanaýı tehnologııalardy engizetin jobalarǵa beriledi.
Kezdesý qorytyndysy boıynsha taraptar ınvestıtsııalardy qorǵaý mehanızmderin jetildirý jáne bıznes pen memleket arasyndaǵy syndarly dıalogty damytý boıynsha birlesken jumysty jalǵastyrýǵa ýaǵdalasty.
Budan buryn Almatyda bıyl 300 shaqyrymnan astam elektr jelileri aýystyrylatynyn jazǵan edik.