Almatyda ınvestorlar esebinen qansha saıabaq salynady

ALMATY. KAZINFORM — Almatyda saıabaq pen skverlerdi qosqanda 500-ge jýyq qoǵamdyq keńistik bar. 

Aldaǵy ýaqytta olardyń sanyn kóbeıtý josparlanyp otyr. Qoǵamdyq keńistikterdi damytý basqarmasynyń málimetinshe, Almatyda búgingi kúni birneshe iri saıabaqtyń qurylysy júrip jatyr. Olar — «Ońtústik» saıabaǵynyń soltústigindegi jasyl aımaqtyń qurylysy jáne Geologtar alleıasyn kúrdeli jóndeý jobasy. Sondaı-aq Nazarbaev dańǵylynyń batysynda, Gandı kóshesiniń soltústiginde saıabaq ashylmaq. Alaıda bul joba aralas qarjylandyrý arqyly, ıaǵnı jergilikti bıýdjet pen jeke ınvestıtsııalar esebinen salynyp jatyr.

— Atalǵan nysandardy osy jyly paıdalanýǵa berý josparlanyp otyr, — dep habarlady basqarmadan.

Sonymen qatar ınvestorlar qarajaty esebinen 2026 jyly paıdalanýǵa beriletin birneshe joba bar. Olar: Túrksib aýdanyndaǵy Baým toǵaıynyń aýmaǵyn qalpyna keltirý, Ál-Farabı dańǵylynan Rysqulov dańǵylyna deıingi Esentaı ózeniniń jekelegen ýchaskelerin kúrdeli jóndeý jáne jaǵalaýyn abattandyrý, sondaı-aq Bostandyq aýdanynda Flow Park saıabaǵynyń qurylysy.

— Aldaǵy ýaqytta qoǵamdyq keńistikterdi damytýǵa jeke ınvestıtsııalardy tartý josparlanyp otyr, bul jergilikti bıýdjet qarajatyn ońtaıly jáne utymdy paıdalanýǵa múmkindik beredi, — delingen vedomstvo jaýabynda.

Búgingi tańda Almaty qalasynda jalpy aýdany 1 200 gektardan asatyn 473 qoǵamdyq keńistik bar.

Atap aıtqanda: 

— Alataý aýdanynda — 102 nysan, jalpy aýdany 144 ga;
— Túrksib aýdanynda — 62 nysan, 138,8 ga;
— Áýezov aýdanynda — 71 nysan, 89 ga;
— Bostandyq aýdanynda — 36 nysan, 219 ga;
— Almaly aýdanynda — 49 nysan, 305 ga;
— Jetisý aýdanynda — 65 nysan, 110 ga;
— Naýryzbaı aýdanynda — 12 nysan, 10 ga;
— Medeý aýdanynda — 76 nysan, 197 ga.

Sondaı-aq buǵan deıin Alataý aýdany Momyshuly kóshesinde ınvestıtsııa esebinen 25 gektar aýmaqty qamtıtyn zamanaýı saıabaq salynatynyn jazǵanbyz. Ol úshin 6 mlrd teńge jumsalady.