Almatyda ınternet-alaıaqtyqqa paıdalanylǵan arnaıy jabdyq tárkilendi

ALMATY. KAZINFORM – Almatyda ınternet-alaıaqtyq jasaý úshin qoldanylǵan arnaıy qural-jabdyq tárkilendi.

Almaty polıtsııa departamenti kıberqylmysqa qarsy is-qımyl basqarmasynyń qyzmetkerleri, QR ІІM KQD, qalalyq prokýratýranyń úılestirýimen, sondaı-aq UQK aýmaqtyq bólimshesi jáne baılanys operatorymen ózara yqpaldastyqta ınternet-alaıaqtyq jasaý úshin qoldanylǵan Sim-box tıptes arnaıy qural-jabdyqty anyqtap, tárkiledi. Jedel is-sharalar barysynda zańsyz trafık uıymdastyrǵan eki jas jigit ustaldy.

– Biz telekommýnıkatsııalyq jabdyqty paıdalana otyryp jasalatyn qylmystyq shemalardy anyqtaý jáne jolyn kesý boıynsha júıeli jumysty jalǵastyryp jatyrmyz. Basty mindetimiz – zańsyz trafık arnalaryna der kezinde tosqaýyl qoıý, kıberqylmyskerlerdiń áreketine bóget jasaý jáne azamattardyń qaýipsizdigin qamtamasyz etý. Seriktes qurylymdarmen ózara is-qımyl mundaı qaýipterdi tıimdi anyqtaýǵa jáne beıtaraptandyrýǵa múmkindik beredi, - dedi Almaty polıtsııa departamenti Kıberqylmysqa qarsy is-qımyl basqarmasy bastyǵynyń orynbasary Erkebulan Qoıshybaev.

Polıtsııanyń habarlaýynsha, bul derek boıynsha qylmystyq is qozǵaldy. Saraptamalar taǵaıyndaldy.

Oqıǵanyń barlyq jaı-japsaryn jáne oǵan qatysy bar tulǵalardy anyqtaýǵa baǵyttalǵan tergeý áreketteri júrgizilip jatyr.

Eske salaıyq, buǵan deıin Almaty polıtsııa departamenti qyzmetkerleri Báıterekov kóshesindegi páterden Reseı Federatsııasynyń 18 jastaǵy azamatyna tıesili «Sim-Box» qurylǵysyn, qazaqstandyq uıaly baılanys operatorlarynyń 300-den astam SIM-kartasyn jáne ózge de jabdyqtardy tárkilegen edi.