Almatyda ınternet-alaıaqtyq isine qatysty 10-nan astam adam ustaldy

ALMATY. KAZINFORM – Almaty qalasy prokýratýrasynyń úılestirýimen quqyq qorǵaý organdary jalpy 300 mln teńgeden astam shyǵyn keltirgen ınternet-alaıaqtyq pen nesıelerdi zańsyz rásimdeýge qatysy bar qylmystyq toptardyń jolyn kesti. 

Birinshi jaǵdaıdaalaıaqtar ózderin memlekettik organdar men bank qyzmetkerleri retinde kórsete otyryp, qart azamattardan aqsha, onyń ishinde páterlerdi satýdan alynǵan jáne bank depozıtterinen alynǵan aqshany urlap ketken. Aqshany berý jetkizý qyzmetteriniń kýrerleri arqyly júzege asyrylǵan.

Ekinshi epızodta áleýmettik osal tulǵalarǵa qaıtarymsyz avtokredıtterdi rásimdep, keıinnen avtokólikterdi, onyń ishinde el aýmaǵynan tysqary jerlerge áketip, qaıta satqan uıymdasqan top anyqtaldy. Qarjy uıymdaryna keltirilgen shyǵyn 66 mln teńgeden asty.

Jedel-tergeý sharalary barysynda 10-nan astam kúdikti ustaldy, kúdiktilerdiń bireýine izdeý jarııalandy, ondaǵan tintý júrgizilip, aqshalaı qarajat, qarý, uıaly telefondar men qujattar tárkilendi.

Aıta ketelik Shymkentte kıberpolıtseıler iri ınternet-alaıaqtyq shemasyn anyqtady.