Almatyda ınteraktıvti aımaqtary bar zamanaýı balalar kitaphanasy ashylady
ALMATY. KAZINFORM — «Jas Qanat» turǵyn úı kesheninde ornalasatyn Almaty kitaphanalarynyń jańa fılıalynda ınteraktıvti aımaqtary, tsıfrlyq servısteri jáne shyǵarmashylyq sheberhanalary bar zamanaýı balalar kitaphanasy ashylady. Bul týraly Almaty qalasy Mádenıet basqarmasy habarlady.
Bul ıdeıa segiz almatylyq kitaphanashy Estonııa, Fınlıandııa jáne Shvetsııada ótken «Shekarasyz bilim» atty halyqaralyq taǵylymdamadan keıin týyndady.
Tallınde mamandar kitaphanalardyń balabaqshala jáne mekteptermen yqpaldasýyn, urpaqaralyq oqytý úlgilerin zerttedi. Helsınkıde tsıfrlyq ózin-ózi qyzmet kórsetý júıesin: sensorly dúńgirshekter men QR-gıdterdi, OODI Ulttyq kitaphanasynyń tájirıbesin kórdi. Shvetsııada ǵylym, tehnologııa, ınjenerııa, óner jáne matematıkany biriktiretin STEAM-jobalarymen tanysty.
Bul ıdeıalar qazirdiń ózinde engizilip jatyr: orta bilim berý uıymdarymen áriptestik aýqymy keńeıip, balalardy mektep tabaldyryǵyn attaǵan sátten bastap kitap oqýǵa baýlý múmkindigi artty; úıirme baǵdarlamalary jańartyldy; Alatau Creative Hub bazasynda oqý men shyǵarmashylyq kezdesýlerge arnalǵan jazǵy terrasa jasaqtaldy.
— Bul taǵylymdama qyzmetkerlerimizge shabyt qana emes, naqty quraldar da berdi. Jańa fılıalda ınteraktıvti aımaqtary, tsıfrlyq servısteri jáne sheberhanalary bar zamanaýı balalar kitaphanasy ashylady. 1 qyrkúıekten bastap birinshi synyp oqýshylary úshin ashyq esik kúnderin ótkizemiz, al aǵa býynǵa arnalǵan kompıýterlik saýattylyq baǵdarlamasyn kúsheıtemiz. Munyń bári bizdiń mamandar Estonııa, Fınlıandııa jáne Shvetsııada kórip, beıimdelgen sheshimder. Qazirdiń ózinde bul jobalar almatylyqtardyń ıgiligine qyzmet ete bastady, — dedi Almaty kitaphanalarynyń dırektory Meıram Bektembaev.
Bul almatylyq kitaphanashylardyń alǵashqy halyqaralyq taǵylymdamasy emes. Buǵan deıin 22 maman Koreıa Respýblıkasynda, Shveıtsarııa men Germanııada bilim alǵan. Úzdik tájirıbeler Almaty kitaphanalaryn zamanaýı bilim, tehnologııa jáne mádenı qarym-qatynas ortalyqtary retinde damytýǵa jol ashyp otyr.
Búginde qala turǵyndaryna táýlik boıy qyzmet kórsetetin 24/7 kitaphana fılıaldary, metro men saýda ortalyqtaryndaǵy avtonomdy ózin-ózi qyzmet kórsetý beketteri, tsıfrlyq kitap qory bar almatylibrary.kz portaly, ınklıýzıvti alańdar jáne mazmundy mádenı-tanymdyq is-sharalar baǵdarlamalary qoljetimdi.
Aıta ketelik aýyl turǵyndary Bıblıobýs jyljymaly kitaphana arqyly kitap oqý múmkindigin alatyny týraly jazǵan edik.