Almatyda ınklıýzıvti mekteptiń ekinshi bólimshesi ashyldy
Almatyda "Pedagog akademııasy" qoǵamdyq birlestigi ınklıýzıvti mektebiniń ekinshi bólimshesi ashyldy. Alǵashqy bólimshe buǵan deıin Naýryzbaı aýdanynda ashylǵan bolatyn. Bul týraly Kazinform tilshisine "Pedagog akademııasy" jáne "Balalar ınklıýzıvti akademııasy" qoǵamdyq birlestikteriniń tóraǵasy, ınklıýzıvti mekteptiń dırektory Nurym Nurǵalıev aıtyp berdi.
Spıkerdiń sózinshe Bostandyq aýdanynda ashylǵan jańa ortalyqta tórt kabınet bar, onda logoped, defektolog, psıholog jáne emdik deneshynyqtyrý mamandary balalarmen jumys isteıdi.
"Balalardy biz aptanyń jeti kúninde tańǵy saǵat 9.00-den keshki 18.00-ge deıin qabyldaımyz. Bizde bári tegin. Búgingi kúni Almaty qalasy boıynsha bizdiń ınklıýzıvti mektebimizde 100-den astam bala oqıdy. Onyń 30-y osy Bostandyq aýdanyndaǵy ortalyqqa kelse, qalǵany Naýryzbaı aýdanynda oqıdy. Naýryzbaı aýdanyndaǵy ınklıýzıvti mekteptiń bólimshesinde 8 maman jumys jasaıdy. Sebebi, ol jerdegi bólimshemiz úlken", - deıdi Nurym Nurǵalıev.
Bıyl qyrkúıek aıynan bastap elimizde "úıden tys oqytý" áleýmettik jobasy bastaý aldy.
"Joba aıasynda biz úıden oqýǵa keńes berilgen balalardy osynda ákelip oqytamyz. Eger úıden oqýǵa keńes berilgen bastaýysh synyp oqýshysyna 8 akademııalyq saǵat bólinse, biz ol ýaqytty eki ese, ıaǵnı, 16 saǵatqa kóbeıttik. Osy arqyly balalar ortalyqqa aptasyna tórt ret kelip, tórt mamanmen kezdesedi. Bul óte tıimdi boldy, sebebi bala sharshamaıdy, ekinshiden bólimshege kelgen balanyń qarym-qatynasy úıdegideı emes, qoǵamǵa beıimdelip, jaqsara túsedi. Úshinshiden, balalar bir-birimen de jaqsy qarym-qatynasta bolýlary úshin olardy toptastyryp oqytamyz", - dedi spıker.
Onyń aıtýynsha, túzetý kabınetterine kóbinese mektep jasyna deıingi balalar keledi.
"Olardyń dıagnozdary onsha aýyr emes. Olarda tek til kemistigi bar. Olarmen logopedter jumys isteıdi. Al endi úıden oqıtyn balalarymyz bar, olar - basqa bilim mekemeleri almaǵan nemese ata-anasyna úıine kelip oqytý formaty unamaıtyn balalar. Olardyń dıagnozdary da nasharlaý. Olar negizinen aýtızmmen aýyratyn, ıntellektisi buzylǵan balalar. Olarǵa bizdiń osyndaǵy mamandarymyz jan-jaqty kómektesip jatyr. Sondaı-aq qazirgi tańda Bostandyq aýdanynyń ákimdigine balalar úshin artterapııa úıirmesin ashsaq degen ótinish joldadyq. Eger ótinishimiz iske assa, keıbir balalarǵa artterapııa uıymdastyratyn bolamyz. Oǵan múmkindigimiz bar", - dedi Nurym Nurǵalıev.
Qazaqstanda "Balalar ınklıýzıvti akademııasy" qoǵamdyq birlestiginiń búginde 12 fılıaly bar. Olardyń basshylary úzdik ustazdar, pedagogter.
"Atalǵan 12 fılıaldyń ishinde 6 óńir, 7 qalada 500-ge jýyq balany biz tegin artterapııa úıirmesi, túzetý kabınetterimen qamtyp otyrmyz. Olar Almaty, Qostanaı, Rýdnyı, Oral, Taraz, Qaraǵandy Petropavl qalalarynda bar. Biz, sondaı-aq, mundaı ortalyqtardy ashý úshin Astana, Atyraý qalalaryna da ótinish joldadyq. Qazir jaýabyn kútip otyrmyz", - dedi Nurym Nurǵalıev.
Eldegi ınklıýzıvti mektepterge negizinen kommertsııalyq emes, qoǵamdyq birlestikter, qorlar kómektesip, qoldaý kórsetip jatady.
"Bizdiń úlken demeýshilerimiz bar dep aıta almaımyn. Biz joǵaryda atalǵan fılıaldar arqyly bir-birimizge kómektesip jatyrmyz. Aıtý kerek, bizge kóbinese qarapaıym azamattar kómektesedi. Al memleket tarapynan, ókinishke oraı, eshqandaı kómek joq. Qansha aıtsaq ta, bizdi eshkim estimeı jatqan sekildi. Bárin óz kúshimizben jasap jatyrmyz", - dedi spıker.
Aıta keteıik Almatyda "Pedagog akademııasy" qoǵamdyq birlestigi ınklıýzıvti mektebi bólimshesiniń saltanatty ashylýyna Bostandyq aýdany ákimdiginiń ókilderi, qalalyq máslıhattyń depýtaty, qoǵamdyq keńestiń tóraıymy Altynaı Kólbıeva, "Aýtızm jan álemi" qoǵamdyq qorynyń dırektory Sholpan Súgirbekova qatysyp, jyly lebizderin bildirdi.
