Almatyda Infektsııalyq aýrýlardyń ulttyq ǵylymı ortalyǵy ashyldy
ALMATY. KAZINFORM — Infektsııalyq aýrýlardyń ulttyq ǵylymı ortalyǵy bıologııalyq qaýipsizdik júıesin nyǵaıtý maqsatynda Memleket basshysynyń tapsyrmasymen qurylǵan.
Alataý aýdanynda ornalasqan nysannyń ashylý rásimine QR Premer-mınıstriniń orynbasary — Mádenıet jáne aqparat mınıstri Aıda Balaeva, QR Densaýlyq saqtaý mınıstri Aqmaral Álnazarova jáne Almaty ákimi Darhan Satybaldy qatysty.
Almaty ákimdiginiń málimetinshe, ortalyq klınıkalyq kómek pen ǵylymı zertteýdi, tsıfrlyq tehnologııany jáne bilim berý baǵdarlamalaryn biriktiredi. Munda eresekterge, balalarǵa jáne júkti áıelderge arnalǵan mamandandyrylǵan medıtsınalyq kómek kórsetiledi.
Tótenshe jaǵdaı kezinde oryn sany 350-den 500-ge deıin kóbeıedi. Ortalyqta dıagnostıka men emdeýden bastap kúrdeli zerthanalyq zertteýler júrgizýge deıingi tolyq tsıkl qamtamasyz etilgen. Onyń ishinde dárige tózimdi týberkýlez túrlerin anyqtaý men emdeý de bar.
— Qala úshin bul ortalyqtyń ashylýy ınfektsııalyq qyzmettiń múmkindigin keńeıtip, mamandandyrylǵan medıtsınalyq kómektiń qoljetimdiligin arttyrady, — dep habarlady ákimdikten.
Eske salaıyq, buǵan deıin jynystyq ınfektsııalardyń qaısysy Qazaqstanda jıi anyqtalatynyn jazǵanbyz.