Almatyda ındýstrıaldyq aımaqtyń aýmaǵy keńeıtiledi

ALMATY. KAZINFORM — Almatyda ındýstrıaldyq aımaqty keńeıtý úshin jer telimderi alynady. 

Almaty qalasy ákimdiginiń 2025 jylǵy 22 jeltoqsandaǵy № 4/675-1585 qaýlysyna sáıkes, ındýstrıaldyq aımaqtyń aýmaǵyn keńeıtý úshin Alataý aýdany «Alǵabas» shaǵyn aýdanynda ornalasqan 37 jer ýchaskesin memleket muqtajyna alynady. Májbúrlep ıelikten shyǵarý merzimi — 2028 jyldyń 31 jeltoqsanyna deıin belgilengen.

Jer telimderiniń menshik ıelerine Almaty qalasy jer qatynastary basqarmasy zańnamamen belgilengen tártipte ótemaqy tóleıdi. Ýchaskeler memleket menshigine alynǵan soń, Almaty qalasy kásipkerlik jáne ınvestıtsııalar basqarmasynyń teńgerimine beriledi.

Eske salaıyq, buǵan deıin Almatyda 32 jer telimi avtomobıl parkiniń qurylysyna, avtobýs parkin keńeıtýge, aýmaqty abattandyrýǵa jáne mektep aýmaǵyn keńeıtýge májbúrli túrde alynatynyn jazǵanbyz.