Almatyda hostelderdi jappaı tekseristen soń myńnan astam zań buzý deregi anyqtaldy
ALMATY. KAZINFORM – Qalada hostelder men shaǵyn qonaq úılerde kóshi-qon zańnamasynyń saqtalýyn baqylaý jáne qoǵamdyq qaýipsizdikti qamtamasyz etý maqsatynda reıdtik is-sharalar júrgizilip jatyr.
Almaty polıtsııa departamentiniń málimetinshe, 10-20 sáýir aralyǵynda 158 hostel jáne 169 ornalastyrý nysany tekserilip, 149 shetel azamaty baqylaýdan ótti. Nátıjesinde 1 087 ákimshilik quqyq buzýshylyq anyqtaldy.
Onyń ishinde 648 – kóshi-qon zańnamasyn buzý deregi, 121 – shetel azamattarynyń bolý erejesin buzý, 169 – qoǵamdyq orynda alkogol ishý, 139 – qoǵamdyq tártipti buzý, 62 – kámeletke tolmaǵandardyń túngi ýaqytta zańsyz júrýi, 10 – esirtki tutyný faktisi tirkeldi. Sonymen qatar sot sheshimimen 4 shetel azamaty el aýmaǵynan shyǵaryldy.
Polıtsııa mundaı reıdter qoǵamdyq tártipti saqtaý maqsatynda turaqty túrde jalǵasatynyn málimdedi.
Eske salaıyq, buǵan deıin Almatyda kóshi-qon zańnamasyn buzǵan 132 sheteldik el aýmaǵynan shyǵarylǵanyn habarlaǵanbyz.
