Almatyda hosteldegi órtke qatysty sot otyrysy bastaldy

ALMATY. KAZINFORM – Almatyda 13 adam ólim qushqan hosteldegi órt boıynsha sot otyrysy bastaldy.

Іs Almaly aýdandyq sotynda sýdıa Ernar Qasymbekovtiń tóraǵalyǵymen qaralyp jatyr. QR Qylmystyq kodeksiniń 292-babynyń 3-bóligi (Abaısyzda eki nemese odan da kóp adamnyń ólimine ákep soqqan órt qaýipsizdigi talaptaryn buzý) boıynsha eki adamǵa aıyp taǵylyp otyr. 

Eske salaıyq, 2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtengen bolatyn. 

Tótenshe jaǵdaı departamentine órt týraly habarlama 05:33-te túsken. Órt saldarynan hostelde 13 adam qaıtys boldy. Mert bolǵan 13 adamnyń tórteýi – sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy – Qazaqstan Respýblıkasynyń azamattary. 

Keıinirek órtengen hosteldiń ıeleri belgili boldy. Hostel ǵımaraty Halyk Bank-ke tıesili. Ony jalǵa alǵan – «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan. 

Ótken jyldyń jeltoqsan aıynda hosteldiń basshysy ustaldy. 

Osyǵan deıin Almaty qalasynyń prokýratýrasy hosteldegi órtke baılanysty tergeýdiń aıaqtalǵanyn habarlady.