Almatyda hokkeıden Azııa chempıonaty qalaı ótip jatyr
ALMATY. KAZINFORM - Almatyda osy kúnderi hokkeıden Azııa chempıonaty ótip jatyr. Kazinform tilshisi Japonııa men Ońtústik Koreıa arasyndaǵy oıynǵa qatysyp, komanda jankúıerlerimen tildesip qaıtty.
Elimizdiń ońtústik astanasy alǵash ret Halyqaralyq shaıbaly hokkeı federatsııasynyń (IIHF) qoldaýymen Azııa birinshiligin qabyldap otyr. Týrnır Halyk Arena kópfýnktsıonaldy sport kesheninde ótip jatyr.
Jarystar 6 qarasha kúni bastaldy. Azııa birinshiliginiń alǵashqy oıynynda Qazaqstan hokkeı quramasy Ońtústik Koreıaǵa jol berdi. Oıyn nátıjesi boıynsha Qazaqstan quramasy qarsylasyna 1:4 esebimen ese jiberdi. Sondaı-aq birinshi týrda Japonııa quramasy Qytaıdy 4:1 esebimen tize búktirdi.
Búgin Halyk Arena-da Japonııa men Ońtústik Koreıa arasynda kezdesý ótti. Stadıonda jarys qojaıyny Qazaqstanda oıynynda sekildi kórermender qarasy kóp bolmady. Alaıda eki eldi arnaıy qoldaýǵa kelgen jankúıerler barshylyq.
«Biz búgingi oıynǵa anam ekeýmiz keldik. Osy Almatyda turamyz. Qazir Ońtústik Koreıaǵa qoldaý bildirip otyrmyz. Stadıondaǵy kóńil-kúı óte tamasha. Ózim hokkeıdi kóp kóre bermeımin. Biraq Azııa chempıonaty ótip jatqanyn estip, búgin Koreıany qoldaýǵa arnaıy keldim», - dedi Kesha esimdi jankúıer.
Hokkeı tamashalaýǵa kelgen jankúıerler qatarynda pákistandyq Tadjamýl Muhammad pen úndistandyq Aıýshı Lalvanı da boldy. Almatyda bilim alatyn stýdentter bul oıynda Japonııaǵa jankúıer bolǵandaryn aıtty.
«Biz stýdentbiz jáne osy Almatyda bilim alamyz. Úndistanda hokkeı qatty tanymal emes. Sondyqtan búgin óz kózimmen stadıonda birinshi ret kórip otyrmyn. Dál qazir Japonııany qoldap júrmin jáne japondyqtar jeńip jatqandyqtan óte keremet sezimdemin. Azııa birinshiligin Japonııa jeńedi dep oılaımyn», - dedi Aıýshı Lalvanı.
Aıta ketken jón, Azııa chempıonaty 9 qarashaǵa deıin jalǵasady. Bul týrnır 2025 jyly 7-14 aqpan aralyǵynda Qytaıdyń Harbın qalasynda ótetin Azııa oıyndaryna daıyndyq jarystary retinde uıymdastyrylyp otyr.
Eske salaıyq, buǵan deıin shaıbaly hokkeıden Azııa chempıonatynda Qazaqstan áıelder quramasy qola alǵanyn jazǵanbyz.
