Almatyda HATÝ eks-rektory merziminen buryn bostandyqqa shyqty

ALMATY. KAZINFORM – Halyqaralyq aqparattyq tehnologııalar ýnıversıtetiniń burynǵy rektory Dámır Shynybekov jazasyn ótep, bostandyqqa shyqty.

Qylmystyq-atqarý júıesi komıtetiniń málimetinshe, oǵan zańda belgilengen tártippen raqymshylyq jasalǵan. Sonyń nátıjesinde jaza merzimi qysqartylyp, qaıta eseptelgen merzimdi eskere otyryp, sottalǵan azamat sot taǵaıyndaǵan jazany tolyq ótegen. Osyǵan baılanysty ol zańdy negizde bosatylǵan.

– Materıaldardy qaraý, merzimderdi qaıta esepteý jáne sottalǵandarǵa qatysty sheshimder qabyldaý sottyń quzyretine jatady jáne mindetti túrde oryndalýǵa tıis, – dep habarlady komıtet ókilderi.

Vedomstvo sondaı-aq zań talaptaryna sáıkes sottalǵan adamnyń jeke isindegi málimetter jarııa etilmeıtinin málimdedi.

Eske salaıyq, 2020 jyldyń qazan aıynda Almatynyń Bostandyq aýdandyq №2 sotynyń úkimimen HATÝ eks-rektory Dámır Shynybekov 8 jylǵa bas bostandyǵynan aıyrylǵan edi. Ol jazany ortasha qaýipsizdik mekemesinde óteýge tıis boldy. Onymen birge ýnıversıtettiń burynǵy bas býhgalteri Janaıym Spabekova da 8 jylǵa sottalǵan.

Sot olardy aldyn ala sóz baılasý arqyly adamdar toby bolyp, qyzmettik jaǵdaıyn paıdalanyp, asa iri kólemde múlikti ıemdený jáne ysyrap etý qylmystary boıynsha kináli dep tanyǵan.

Tergeý derekterine sáıkes, 2013 jyldyń aqpan aıynan 2018 jyldyń qarasha aıyna deıin olar stıpendııalarǵa bólingen 1,7 mlrd teńgeden astam bıýdjet qarajatyn jalǵan kelisimsharttar jasaý jáne qarajatty qolma-qol aqshaǵa aınaldyrý arqyly jymqyrǵan.

Keıin sot úkimine ózgerister engizilip, múlikti tárkileý týraly bólik alynyp tastalyp, ol múlik keltirilgen zalaldy óteý esebine memleket kirisine baǵyttalǵan.

Al 2023 jyly Almaty oblystyq soty Shynybekovke qatysty jazany jeńildetý týraly sheshimdi kúshin joıǵan edi.