Almatyda Halyk Cyber Games 2026 týrnırine myńnan astam oıynshy qatysty

Fınal Forum saýda oıyn-saýyq ortalyǵyndaǵy Event Space alańynda ótti. Baıqaýda Qazaqstannyń ár óńirinen kelgen kásibı jáne áýesqoı oıynshylar, blogerler, strımerler baq synady.

Týrnırdiń negizgi uıymdastyrýshylary — Tımýr Qulıbaevtyń Halyk qaıyrymdylyq qory men Almaty qalasynyń tsıfrlandyrý basqarmasy. Joba University Alliance of Science and Technology joǵary oqý oryndary alıansynyń, NNEF qoǵamdyq qorynyń, Stýdenttik kıbersport boıynsha ulttyq qaýymdastyqtyń (NESA), National Digital Syndicate jáne iPlay Esports qoldaýymen júzege asyryldy.

Týrnır Halyk qaıyrymdylyq qorynyń 10 jyldyǵy qarsańynda ótti. Sonymen birge, qor mereıtoıyna arnalǵan «10 ıgi qadam» bastamasynyń aıasynda uıymdastyryldy. Qor atalǵan bastama sheńberinde mereıtoılyq jylǵa arnalǵan birqatar jobany biriktirgen bolatyn.

Bıyl týrnır baǵdarlamasyna aıtarlyqtaı jańalyqtar engizildi. Joba dástúrli 5×5 komandalyq formaty men medıa komandalar arasyndaǵy Media 5×5 jarysynan bólek, alǵash ret 2×2 formatyndaǵy týrnırdi qamtydy. Jarysqa qatysý tegin boldy.

Stýdenttik kıbersport boıynsha ulttyq qaýymdastyqtyń (NESA) prezıdenti Rahmatýllo Saıdýllaev jarysqa qatysty pikir bildirdi. Onyń sózinshe, keıingi jyldarda Qazaqstanda kıbersport jekelegen stýdenttik bastamalar aıasynan shyǵyp, qarqyndy damydy.

— Sońǵy bes jylda Qazaqstandaǵy kıbersport jekelegen stýdenttik bastamalardan eldiń túkpir-túkpirindegi oıynshylardy, stýdentterdi, blogerlerdi, strımerler men kórermenderdi biriktiretin tolyqqandy ekojúıege aınaldy. Halyk Cyber Games osy ortany keńeıtýge, jańa qatysýshylardy tartýǵa múmkindik beredi. Odan bólek, tsıfrlyq ındýstrııada ósip-órkendeýi úshin jastarǵa jol ashady, — dedi Saıdýllaev.

Jobanyń tarıhy 2020 jyly KESL stýdenttik kıbersport jarystarynan bastaldy. Al 2025 jyly Halyk qaıyrymdylyq qorynyń qoldaýyna ıe boldy. Bıyldan bastap jańa deńgeıge kóterildi dep aıtýǵa tolyqtaı negiz bar.

Aıta keteıik, Qazaqstan Cyber Games Students League onlaın irikteý kezeńi kóktemde ótken bolatyn. Onda Qazaqstannyń 100-den astam joǵary oqý ornynan 1 500-den asa stýdent qatysty. Stýdenttik lıganyń fınaly 18 sáýirde Astana IT University alańynda uıymdastyryldy.

Al qyrkúıek aıynda Media & Cup týrnıri alǵash ret Halyk Cyber Games brendimen ótti. Oǵan BAQ ókilderi, blogerler, strımerler jáne oıyn qaýymdastyǵynyń basqa da ókilderi qatysty.

Bul joba jóninde Halyk qaıyrymdylyq qorynyń basqarýshy dırektory Narıman Ábilshaıyqov tolyǵyraq aıtyp berdi.

— Halyk Cyber Games jobasyn qoldaý arqyly bizdiń qor tek kıbersporttyń damýyna ınvestıtsııa salyp otyrǵan joq. Biz úshin jastardyń komandalyq jumys pen strategııalyq oılaý daǵdylaryn sińirýi, pikirles zamandastaryn tabýy jáne zamanaýı tsıfrlyq ındýstrııada jańa múmkindikterge ıe bolýyna jaǵdaı jasaý mańyzdy, — dedi ol.

Fınaldyq matchtardy 2 myńnan astam kórermen tamashalady. Al jarystyń tikeleı translıatsııasy 7 myńnan astam qaralym jınady. Týrnır aıaqtalǵannan keıin matchtardyń jazbalaryn 100 myńnan astam adam kórdi.

Júlde qorynyń jalpy kólemi 10 mln teńge boldy.

HCG Cup 5×5 formatynda Omega komandasy jeńiske jetip, 3 mln teńge aldy. Ekinshi orynǵa ıe bolǵan Rune Eaters komandasyna 2 mln teńge berildi.

HCG Cup 2×2 formatynda Bratan Team jeńimpaz atanyp, 700 myń teńge ıelendi. Ekinshi oryn alǵan 2k_plus_2k komandasyna 300 myń teńge tabystaldy.

HCG Media 5×5 jarysynda T4iPa komandasy qarsylas shaq keltirmeı, 2 mln teńge jeńip aldy. Ekinshi orynǵa SixSeven komandasy jaıǵasyp, 1 mln teńge júldege ıe boldy.

Odan bólek, taǵy 1 mln teńge fınalǵa kelgen kórermender arasynda ótken ashyq shaǵyn-týrnırlerde sarapqa salyndy.

Eske salaıyq, 2026 jyly Halyk qaıyrymdylyq qory 10 jyldyǵyn atap ótip jatyr. Osy ýaqyt ishinde qor bilim berý, sport, densaýlyq saqtaý, mádenıet, ekologııa, áleýmettik qoldaý jáne óńirlerdi damytý salalarynda 200-den astam jobany júzege asyrdy. Qaıyrymdylyq bastamalaryna baǵyttalǵan qarajattyń jalpy kólemi 100 mlrd teńgeden asty.

Aıta keteıik, buǵan deıin elordada eki kúndik CYBER STEPPE 2026 konferentsııasy ótkenin jazǵanbyz.