Almatyda halyqtyń osal toptary turǵyn úı sertıfıkatyn alýǵa ótinish bere alady

ALMATY. KAZINFORM - Almatyda Memleket basshysynyń tapsyrmasymen júzege asqan «Naýryz» jańa turǵyn úı baǵdarlamasy aıasynda turǵyn úı sertıfıkatyn alýǵa ótinish qabyldaý bastaldy. Bul bastama turǵyn úı alýda kómekke muqtaj halyqtyń neǵurlym osal sanatyn qoldaýǵa baǵyttalǵan.

Almaty qalasy máslıhatynyń sheshimimen bastapqy jarnanyń bir bóligin jabý úshin turǵyn úı sertıfıkatyn berýge qarajat bólindi. Sertıfıkat mólsheri 1,5 mln teńgege deıin, ol óteýsiz ári qaıtarymsyz beriledi.

Sertıfıkat alýshylarǵa JAO kezekte turǵandardyń ishindegi mynadaı sanattar jatady:

1. 1 jáne 2 toptaǵy múgedekter;
2. Múgedek balalary bar nemese olardy tárbıelep otyrǵan otbasylar;
3. Jetim balalar men ata-anasynyń qamqorlyǵynsyz qalǵan balalar;
4. Kópbalaly otbasylar.

Jańa erejege sáıkes, sertıfıkat alý úshin otbasynyń ortasha tabysyn rastaý qajet, ol otbasynyń árbir múshesine osy qarjy jylyna belgilengen eń tómengi kúnkóris deńgeıiniń 3,1 eselengen kórsetkishinen (134 561,7 teńge) aspaýǵa tıis.

Otbasy bankinde tólem qabilettiligin rastaǵan jáne turǵyn úı tapqan azamattar «Kezekte.kz» saıtyndaǵy («Amanat» servısi arqyly) turǵyn úı sertıfıkatyna ótinim bere alady.

Qajetti qujattar:

1. Jumys ornynan anyqtamanyń elektrondyq kóshirmesi (áleýmettik osal toptarǵa talap qoldanylmaıdy);
2. Ipotekalyq turǵyn úı nesıesin berý týraly banktiń maquldaý hatynyń elektrondyq kóshirmesi, onda nesıe somasy men aı saıynǵy tólem mólsheri kórsetilýi kerek.

Ótinishter 3 jumys kúni ishinde qaralady.

— Buǵan deıin turǵyn úı sertıfıkaty tek «Baqytty otbasy» jáne «Shańyraq» baǵdarlamalary aıasynda beriletin, al jańa ózgeris turǵyn úıge muqtaj azamattardy qoldaý múmkindigin keńeıtedi, — dep habarlady Almaty qalasy Kommýnaldyq ınfraqurylymdy damytý basqarmasy.

Eske salaıyq, buǵan deıin «Almaty jastaryna» ótinim bergen 2 myńǵa jýyq jas baspanaly bolǵanyn jazǵanbyz.