Almatyda halyqtyń áleýmettik osal toptaryna qandaı kómek túrleri bar
ALMATY. KAZINFORM - Almatyda halyqtyń áleýmettik osal toptaryn qoldaý úshin áleýmettik kómektiń 17 túri qarastyrylǵan.
Olardyń ishinde - ataýly áleýmettik kómek (AÁK), turǵyn úı kómegi, UOS ardagerlerine jáne azamattardyń basqa da sanattaryna áleýmettik kómek, kommýnaldyq qyzmetterge tarıfterdiń kóterilýine baılanysty áleýmettik kómek, múgedek balalardy úıde oqytqany úshin shyǵyndardy óteý, ataýly kúnder men mereke kúnderine tólemder jáne ózge de birjolǵy áleýmettik tólemder bar.
Almaty qalasy Jumyspen qamtý jáne áleýmettik baǵdarlamar basqarmasynyń málimetine sáıkes, 2024 jyly 14,8 myń adamǵa jalpy somasy 1,6 mlrd teńge kóleminde ataýly áleýmettik kómek kórsetildi. Turǵyn úı kómegi 741 azamatqa 17,3 mln teńge somasynda berildi.
- Kommýnaldyq qyzmetter tarıfteriniń ósýine baılanysty azamattardy qoldaý jeke baǵyt boldy. «Investıtsııalarǵa aıyrbastaý tarıfi» baǵdarlamasy aıasynda halyqtyń áleýmettik osal toptarynyń ishinen 141 myńnan astam adam aı saıyn 0,8 AEK mólsherinde tólem aldy, bul 4 mlrd teńgeden astam soma, - dep habarlady basqarmadan.
Osy jyldyń 1 qańtarynan bastap memlekettik járdemaqylar men bazalyq zeınetaqynyń barlyq túriniń mólsheri 6,5%- ǵa ulǵaıtylǵan, sondaı-aq kómektiń jańa túri engizildi. Mysaly, basqa memleketterdiń aýmaǵyndaǵy áskerı is qımyldardyń ardagerleri úshin Aýǵanstannan áskerlerdi shyǵarý kúnine 100 myń teńgeden jańa tólem engizildi.
Eske salaıyq, buǵan deıin Almatyda 250 myńnan astam zeınetker turatynyn jazǵanbyz.