Almatyda halyqty sýmen qamtamasyz etý máselesi ózekti bolyp otyr
ALMATY. KAZINFORM – Halyqty sapaly sýmen qamtamasyz etý jáne káriz júıesin jabdyqtaý – mańyzdy máseleniń biri. Bul týraly Almaty ákimi Erbolat Dosaev Medeý aýdanynyń turǵyndarymen kezdesý barysynda aıtty.
Shahar basshysynyń sózinshe, bıyl jazda «Balqash» taza sý rezervýary paıdalanýǵa berilip, «Kamensk ústirti» shaǵyn aýdanyndaǵy talaı jyldan beri qordalanǵan sý tapshylyǵy máselesi sheshildi.
«2023 jyldyń mamyr aıynda bastalǵan aýqymdy joba aıasynda 7,3 myń tekshe metr sýǵa arnalǵan 7 rezervýar salynyp, 3 rezervýar jańartyldy. Sondaı-aq táýligine 15,7 myń tekshe metr sý ótkizý qabileti bar 3 jańa uńǵyma paıdalanýǵa berildi. Budan bólek, táýligine 22 myń tekshe metr sý ótkizýge arnalǵan 12 sorǵy ornatyldy jáne Memleket basshysynyń tapsyrmasymen táýligine 32 myń tekshe metr sý berýge arnalǵan rezervtik sý berý júıesi iske qosyldy», - dedi ol.
Negizgi sý kózderi – Talǵar jer asty sýlarynyń ken oryndarynan sý kaskadty ádispen jetkiziledi. Osylaısha, «Samal», «Kóktóbe» jáne « Taýly qyrat» shaǵyn aýdandarynyń bir bóliginiń 50 myń turǵyny sýmen turaqty qamtamasyz etildi.
«Halyq sanynyń ósýine baılanysty, sonyń ishinde «Dýman» shaǵyn aýdanynda sýmen qamtamasyz etý máselesi ózekti bolyp otyr. Jaz mezgilinde qoldanystaǵy rezervýarlardyń ótkizý qabileti aýyz sýǵa degen qajettilikti óteı almaı, táýligine 2,2 myń tekshe metr sý tapshylyǵyna ákeldi. Bul máseleni sheshý úshin tórt jańa rezervýar, 3,5 km sý qubyrynyń qurylysy jáne eki sorǵy stantsııasyn jańǵyrtý josparlanyp otyr. Bul jumystar 2025 jyldyń birinshi toqsanynda bastalady», - dedi ol.
Aıtýynsha, 2024 jyldyń sońyna deıin «Keńsaı», «Kompot», «Dýman» jáne «Kólsaı» shaǵyn aýdandarynda 65 km sý jáne káriz jelileriniń qurylysy aıaqtalady.
Sondaı-aq «Muztaý» jáne «Sulýsaı» shaǵyn aýdandarynda 19,5 shaqyrym sýmen jabdyqtaý jáne káriz jelileriniń qurylysy júrgizilip jatyr. Ony 2025 jyldyń úshinshi toqsanynda aıaqtaý kózdelgen.
«2024 jyldyń naýryz aıynda «Atyraý», «Alataý» jáne «Malaıa Stanıtsa» shaǵyn aýdandary boıynsha 37 km sýmen jabdyqtaý jáne sý burý jelilerin salýǵa memlekettik saraptama alyndy. Jumystar 2025 jyldyń birinshi toqsanynda bastalady. Sondaı-aq, «Askartaý», «ıÝbıleınyı», «Kamensk ústirti» jáne «Taýly qyrat» shaǵyn aýdandarynda 127 km jeli salýǵa qujattama ázirlendi. Saraptama 2024 jyldyń tórtinshi toqsanynda shyǵady», - dedi Erbolat Dosaev.
Eske salsaq, buǵan deıin Almaty qalasynyń ákimi Erbolat Dosaev Medeý aýdanynyń turǵyndarymen kezdeskenin jazǵan edik.