Almatyda halyqty qulaqtandyrý júıesi nege der kezinde iske qosylmady
ASTANA. KAZINFORM – Májilis depýtaty Sergeı Ponomarev jaqynda jerasty dúmpýi bastalǵan kezde tıisti habarlamanyń ýaqytyly taratylmaýy máselesin kóterdi.
Aıta keteıik, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine baılanys, tsıfrlandyrý jáne aqparattandyrý salasynyń ınvestıtsııalyq ahýalyn arttyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
«Keshe Almatyda jer silkingende azamattardy eskertý júıesindegi kemshilikter baıqaldy. Tek Google androıd júıesi arqyly almatylyqtardy habardar etti. Biz bul týraly aqparatty Tótenshe jaǵdaılar mınıstrliginen emes, ulttyq operatordan emes, jahandyq qyzmetterden aldyq. Sondyqtan mundaı jaǵdaıda bizdi kim eskertýi kerek? Eskertý júıemizdiń nesi durys emes? Nelikten baılanys arnalary jumys istemeıdi? Osy zań jobasy boıynsha biz qandaı sheshim taba alamyz?», - dep surady S. Ponomarev.
Óz kezeginde Májilis depýtaty Ekaterına Smyshlıaeva atalǵan jaǵdaıda elimizdiń eskertý júıesinde qandaı da bir kemshilikter bolýy múmkin ekenin aıtty.
«Buǵan kim kináli ekenin anyqtaý maqsatynda jan-jaqty tekserilip jatyr dep sanaımyn. Meniń oıymsha, aqparat kózi málimetti der kezinde joldamady nemese eskertý júıesi jumys istemedi. Qoldanystaǵy zańda baılanys operatorlary qysqa habarlama jiberýge mindettelgen. Biraq qysqa habarlamalardyń merzimi eshqandaı jolmen shektelmegen. Olar habarlamany kúni boıy jiberýi múmkin. Sondyqtan bul turǵyda jedel habarlar túsinigin qaıta qarap, tıisti talaptardy engizý qajet ekenin baıqadyq. Tótenshe jaǵdaı bolǵan kezde olar qysqa ári jyldam bolýy kerek, ıaǵnı bir ýaqytta jiberilýi tıis», - dedi E. Smyshlıaeva.
Bul rette depýtat osy másele Májiliste qaralyp jatqan zań jobasy aıasynda retke keltiriletinin aıtty.
Budan buryn habarlanǵandaı, 23 qańtarda bolǵan Úkimet otyrysynda Premer-Mınıstr Álıhan Smaıylov Almatydaǵy silkinisi kezinde halyqty qulaqtandyrý júıesi der kezinde iske qosylmaǵanyn aıtty.
«Adamdar ýaqtyly aqparattandyrý men aıqyn áreket bolmaǵandyqtan baıbalamǵa boı aldyrdy. Olar 2, 3-qabattan sekirip, oısyz áreketterge bardy. Bul qulaqtandyrý júıesi der kezinde iske qosylmaǵanyn, halyqqa barynsha erte habarlandyrýlar taratyp, habarlandyrý kerek bolǵanyn kórsetedi», — dedi Úkimet basshysy.
