Almatyda halyqaralyq gastrofestıval ótip jatyr
Almatyda halyqaralyq gastrofestıval ótip jatyr, dep habarlaıdy Kazinform.
Іs-shara álemniń túrli ashanasyn baǵalaýshy naǵyz talǵampaz gýrmandardyń basyn qosty. Munda Almaty turǵyndary men qala qonaqtary ǵana emes, Katar, BAÁ jáne Ulybrıtanııadan kelgen fýdblogerler, Úndistan men Qytaıdan kelgen týrıster de bar.
Festıvaldi Almaty qalasynyń Týrızm basqarmasy jáne qonaqtar úshin merekelik atmosfera jasaǵan arnaıy mamandar uıymdastyrdy.
Festıvalde meksıkalyq, lıvandyq, amerıkalyq, azııalyq taǵamdardan jáne qazaqtyń ulttyq taǵamdarynan dám tatýǵa bolady. Al balalar úshin anımatorlar óner kórsetetin arnaıy aımaq uıymdastyryldy.
Munda álemdik deńgeıdegi aspazdardyń aspazdyq shoýlary men sheberlik dáristeri, barmender men barıstalar saıysy, fermerlik ónimder kórsetilip, qolónershiler jármeńkesi ótedi. Ár kúni kesh sońynda qonaqtarǵa qazaqstandyq estrada artısteri óner kórsetedi.
Almaty Food Fest 2023 Abaı atyndaǵy alańda eki kún boıy - 4 jáne 5 qarasha aralyǵynda ótedi.
