Almatyda halyqaralyq Almaty Food Fest 2024 festıvali ótip jatyr
ALMATY. KAZINFORM – Almatyda úshinshi ret Almaty Food Fest 2024 gastronomııalyq festıvali uıymdastyryldy. Halyqaralyq is-shara megapolıstiń Abaı alyńda ótip jatyr. Festıval 25-tamyzǵa deıin jalǵasady.
Respýblıka saraıynyń aldynda merekelik qalashyq quryldy. Munda 50-ge jýyq meıramhana álemniń san túrli ashanalarynyń taǵamdaryn usynsa, 30-dan astam fermerlik jáne qolóner dúńgirshekteri festıval qonaqtaryna qala sheberleriniń buıymdaryn tanystyrdy. Іs-sharaǵa kelgen adamdarǵa Almatynyń basty belgisine aınalǵan alma tegin taratyldy. Sondaı-aq anımatorlar men arnaıy shaqyrylǵan mýzykanttar úlkendi-kishili festıval qatysýshylarynyń kóńil-kúıin kóterdi.
Almatyda bir aptaǵa jýyq qonaq bolǵan Mıshlen juldyzynyń ıegeri, frantsýz aspazy Jerom Kýstııas qazaq ashanasyndaǵy súıikti taǵamy týraly pikir bildirdi.
- Meniń qazir meıramhanam joq. Biraq bolǵan jaǵdaıda as mázirine baýyrsaqtardy qosar edim. Birin úlken, birin shaǵyn qylyp pisirip, qonaqtarǵa usynýǵa bolady. Jalpy bul festıval - qala ashanasynyń aınasy. Shahar qandaı taǵamdardy usyna alatynyn kórsetip jatyr. Festıvaldiń jyldan jylǵa aýqymy úlkeıip, qalaǵa paıdasyn tıgizedi dep oılaımyn, - dedi Jerom Kýstııas.
Festıvaldiń ekinshi kúni ShYU memleketterinen kelgen aspazdar baıqaýda baq synaıdy. Aspazdyq jarysqa arnaıy kelgen Iran eliniń aspazy Fatıma Alızade Almaty týraly óziniń alǵashqy áserimen bólisti.
- Men Irannan keldim. Jasym 39-da. Elimizdiń ulttyq taǵamdaryn kásibı túrde jasap júrgenime 15 jyl boldy. Almatyǵa alǵash ret kelýim jáne bul qala meni qatty tańqaldyrdy. Óte ádemi ári jasyl shahar eken, adamdardy da ashyq. Mundaǵy taǵamdardan maǵan eń unaǵany káýap boldy, - dedi Fatıma Alızade.
Festıval Almaty qalasynyń Týrızm basqarmasynyń uıymdastyrýmen ótip jatyr. Halyqaralyq is-sharaǵa eki kúnde 15 myń adam keledi dep josparlanǵan.
Eske salaıyq, buǵan deıin gastro-festıvaldiń jospary týraly jazǵanbyz.
Sondaı-aq buǵan deıin Mıshlen juldyzynyń ıegeri Jerom Kýstııaspen eksklıýzıvti suhbat jarııaladyq.
