Almatyda «Halyq qatysatyn bıýdjet» baǵdarlamasyna ótinish qabyldanyp jatyr

ALMATY. KAZINFORM - Almatyda «Halyq qatysatyn bıýdjet» baǵdarlamasyna ótinimderdi qabyldaý 9 qyrkúıekte bastaldy. Bir apta ishinde budget.open-almaty.kz saıtyna turǵyndardan 248 ótinish kelip túsken. 2023 jyldyń sáıkes kezeńinde 151 usynys túsken.

Eń kóp ótinim Almaty qalasynyń Naýryzbaı aýdanynda berilgen – 159 joba. Ekinshi orynda Túrksib aýdany – 26 usynys. Kóbinese qala turǵyndary balalar jáne sport alańdaryn ornatý nemese jóndeý, aýlalardy kógaldandyrý, sondaı-aq qoǵamdyq aýmaqtardy jaryqtandyrý jobalaryn usynady.

«2025 jyly «Halyq qatysatyn bıýdjet» baǵdarlamasy boıynsha ıdeıalardy iske asyrý úshin osy jyldyń 25 qyrkúıegine deıin budget.open-almaty.kz portalyna ótinim berý qajet. Barlyq kámeletke tolǵan turǵyndar bıýdjet qarajaty esebinen qalanyń aýlalaryn, kósheleri men aýmaqtaryn abattandyrý boıynsha usynystar jasaı alady. Baıqaý 8 kezeńnen turady: ótinimderdi qabyldaý, saraptamalyq baǵalaý, avtorlardyń jobalardy pysyqtaýy, pysyqtalǵan usynystardy qaraý, daýys berý, daýys berý qorytyndylaryn shyǵarý, bıýdjettik ótinimderdi qalyptastyrý, jobalardy iske asyrý», - dep habarlady ákimdikten.

Aıta ketken jón, ótinishterde jobanyń ataýy men sıpattamasy, ornalasqan jeriniń mekenjaıy, boljaldy fotosýretter, syzba nemese eskız, jobalyq usynystyń smetasy bolýy kerek. Bir ótinish 92,3 mln teńgeden (25 myń AEK) aspaýy kerek.

Erejeler týraly tolyǵyraq budget.open-almaty.kz ınternet-portalynan oqýǵa bolady.

Eske salaıyq, buǵan deıin «Halyq qatysatyn bıýdjet» baǵdarlamasy arqyly aýlasyn kórkeıtken Almaty turǵyny jurtty tańǵaldyrǵanyn jazǵanbyz.