Almatyda «Halyq arena» men «Atletıkalyq aýyl» jóndeýden ótedi

ALMATY. KAZINFORM – Almatydaǵy basty sport keshenderiniń biri – «Halyq arenada» jóndeý jumystary júrgiziledi.

Byltyr elimizdiń 5 óńirinde sport nysandary, onyń ishinde «Halyq arena» memleket menshigine qaıtaryldy. 

Keıin nysan «Almaty qalasynyń sporttyq ǵımarattary dırektsııasy» JShS-yna senimgerlik basqarýǵa berildi.

Endi sport keshenin basqarýǵa alǵan kompanııa «Halyq Arenada» aǵymdaǵy jóndeý jumystaryn júrgizýdi josparlap otyr. Tıisti lot memlekettik satyp alý saıtynda jarııalandy.

Bul maqsatta 43 467 244 teńge jumsalmaq.

Habarlandyrýda kórsetilgen tehnıkalyq erekshelikke sáıkes, merdiger qabyrǵalardaǵy jaryqtardy jóndep, syrlaý jumystaryn júrgizýge, kıim aýystyratyn bólmeler men jýynatyn bólmelerdiń qabyrǵalary men edenderin jóndeýge, muzdy jınaýǵa arnalǵan shuńqyrlarda gıdrooqshaýlaýǵa, pandýs pen baspaldaqtyń betin gıdrooqshaýlaýǵa jáne basqa jumystardy oryndaýǵa mindetti. Sonymen qatar merdiger uıym jóndeý jumystaryn aıaqtaǵannan keıin 2 jyl merzimge kepildik beretin bolady.

Sonymen qatar Almaty qalasynyń sporttyq ǵımarattary dırektsııasy Nurkent 5/11 mekenjaıynda ornalasqan «Atletıkalyq aýylda» jóndeý jumystaryn júrgizýge 42 841 234 teńge jumsaýdy josparlap otyr. Bul maqsatta bólek lot jarııalanǵan.

Eske salaıyq, Almatyda ótken Ýnıversıada qarsańynda 2017 jyly «Atletıkalyq aýyl» salynǵan bolatyn.

Buǵan deıin memleketke qaıtarylǵan «Almaty arena» men «Halyq arenada» qandaı ózgeris bolatyny týraly jazǵanbyz.