Almatyda grek-rım kúresiniń palýany kúsh qoldanǵany úshin aıyptalyp jatyr
Almatyda saýda ortalyqtarynyń birinde grek-rım kúresinen Qazaqstan chempıony Almat Kebispaev bir jigitti uryp qulatty, dep habarlaıdy QazAqparat tilshisi.
Jelide grek-rım kúresinen Qazaqstan chempıony Almat Kebispaev jigitti uryp qulatqany týraly aqparat shyqty.
Vıdeodaǵy jazbada grek-rım kúresinen Qazaqstannyń birneshe márte chempıony, álem chempıonattarynyń júldegeri Almat Kebispaev saýda ortalyǵyndaǵy balalar oıyn-saýyq alańynda bes balanyń ákesin uryp qulatqany jazylǵan.
Almaty qalalyq polıtsııa departamentiniń málimetinshe, 6 qyrkúıekte Bostandyq aýdandyq polıtsııa basqarmasyna 1986 jyly týǵan M.esimdi azamat 1987 jylǵy K.esimdi azamatqa qatysty aryzdanǵan.
"Atalǵan derek QR QK-niń 73-1 baby 1 bóligimen tirkeldi.
M.esimdi azamattyń alǵan jaraqatynyń aýyrlyǵyn anyqtaý maqsatynda sot-medıtsınalyq saraptama taǵaıyndaldy. Saraptamalyq zertteýdiń qorytyndysyn alǵan soń materıal sheshim qabyldaý úshin Almaty qalasyndaǵy MAÁS-na jiberiletin bolady", - dep habarlady qalalyq polıtsııa departamenti baspasóz qyzmeti.
