Almatyda Gorkıı saıabaǵyndaǵy 5 gektar jer memleket menshigine qaıtarylady
ALMATY. KAZINFORM — Almaty ákimdigi Gorkıı atyndaǵy Ortalyq mádenıet jáne demalys saıabaǵy aýmaǵyndaǵy jer telimderin jalǵa berý merzimin uzartýdan bas tartty.
Qala ákimdiginiń málimetinshe, mundaı sheshim jalǵa alýshy — «TFK „Altyn-Taraz“ JShS tarapynan saıabaqty kóriktendirý men ınfraqurylymdy damytýǵa qajetti ınvestıtsııa salynbaýyna baılanysty qabyldanǵan. Jalǵa alýshy ákimdik sheshimine sot arqyly shaǵymdanýǵa árekettengenimen, sot talap aryzdy qanaǵattandyrmady.
Osylaısha, saıabaq aýmaǵyndaǵy jalpy kólemi 5 gektardan turatyn 94 jer telimi memleket qaramaǵyna ótedi.
Jalǵa alý qatynastaryn toqtatýǵa saıabaq aýmaǵynyń uzaq ýaqyt boıy tıisti deńgeıde kútip ustalmaýy negizgi sebepterdiń biri boldy. Qazirgi tańda ınfraqurylym men attraktsıondardyń edáýir bóligi eskirgen. Qalanyń basty demalys oryndarynyń biriniń jaǵdaıyna qatysty turǵyndar tarapynan da kóp syn-eskertý aıtylyp keledi.
— Óziniń tarıhı ári mádenı mańyzyna qaramastan, búginde saıabaq qoǵamdyq keńistikterge qoıylatyn zamanaýı talaptarǵa tolyq sáıkes kelmeıdi. Osyǵan baılanysty Almaty ákimdigi aýmaqty keshendi jańǵyrtý tujyrymdamasyn ázirleýdi josparlap otyr. Joba aıasynda kógaldandyrý, zamanaýı demalys aımaqtaryn qurý, sondaı-aq týrıstik jáne mádenı ınfraqurylymdy damytý kózdelgen. Bul óz kezeginde saıabaqty qala turǵyndary men týrıster úshin jaıly ári tartymdy qoǵamdyq keńistikke aınaldyrýǵa múmkindik beredi, — delingen habarlamada.
Eske salaıyq, buǵan deıin Almatyda bıyl qandaı jańa saıabaq salynatyny jóninde jazǵanbyz.
