Almatyda Golan jotasynan oralǵan bitimgerlerge qurmet kórsetildi
ALMATY. KAZINFORM — Almaty qalasy 28 panfılovshy saıabaǵynda QR Qarýly Kúshteriniń Ekinshi ulttyq kontıngentin saltanatty qarsy alý rásimi ótti.
Ulttyq kontıngenttiń ekinshi quramy Birikken Ulttar Uıymynyń UNDOF quramyndaǵy bitimgershilik mıssııasyn Golan jotasynan sátti aıaqtaǵan. Olardyń qurmetine Almatyda uıymdastyrylǵan saltanatty is-sharaǵa QR Qarýly Kúshteriniń Qurlyq áskerleriniń qolbasshylyǵy, Qorǵanys mınıstrliginiń bitimgershilik operatsııalar ortalyǵynyń basshylyǵy men jeke quramy, bitimgershilik mıssııalarynyń ardagerleri, bitimgerlerdiń týystary qatysty.
Qazaqstan Respýblıkasy Qarýly Kúshteri Qurlyq áskerleriniń bas qolbasshysy, general-maıor Mereke Kóshekbaev bitimgerlerdi elge oralýymen quttyqtady.
— Elden jyraqta, jaýapty aımaqta halyqaralyq bitimgershilik mindetterin abyroımen oryndaǵan jaýyngerlerimiz týǵan jerge aman-esen oraldy. Sizder el senimin arqalap bardyńyzdar. Qazaqstannyń kók baıraǵyn bıik ustap, áskerı antqa adaldyq tanyttyńyzdar. Bitimger bolý — beıbitshiliktiń elshisi bolý degen sóz. Bul — úlken abyroı, sonymen qatar zor jaýapkershilik. Sebebi bitimgershilik mıssııada árbir qadam, árbir sheshim, árbir is-áreket jeke áskerı qyzmetshiniń ǵana emes, tutas memlekettiń bedelimen ólshenedi, — dedi general-maıor Mereke Kóshekbaev.
Sonymen qatar ol Qazaqstannyń Birikken Ulttar Uıymy aıasyndaǵy bitimgershilik qyzmeti jańa deńgeıge kóterilgenin atap ótti. Aıtýynsha, Golan bıiktikterindegi operatsııaǵa qatysý arqyly elimiz bitimgershilik áleýeti bar memleketterdiń qatarynan kórindi. Odan bólek Qazaqstan áskeriniń kúrdeli mindetterdi oryndaýǵa qabiletti ekenin, áskerı qyzmetshilerdiń halyqaralyq talaptarǵa saı daıyndyǵyn aıqyn kórsetti.
Ekinshi ulttyq bitimgershilik kontıngenttiń komandıri, podpolkovnık Jánibek Nurlanov elge oralǵan jaýyngerler atynan sóz sóıledi.
— Búgingi saltanatty is-shara halyqaralyq bitimgerler kúnimen sáıkes kelip tur. Balalardyń túrine qarasań, qýanysh bilinbeıtin sııaqty. Biraq men komandır bolǵannan keıin onyń barlyǵyn kórip turamyn — qýanysh árkimniń ishinde, — dedi ol.
Sonymen qatar Jánibek Nurlanov bitimgerlerge Golan jotasynda qandaı mindetter júktelgenin aıtty. Onyń sózinshe, sarbazdardyń jaýapkershiligine BUU ujymynyń qaýipsizdigin qamtamasyz etý, olardy evakýatsııalaý jáne alǵashqy medıtsınalyq kómekter kórsetý, aýmaqty jarylǵysh zattardan zalalsyzdandyrý mindetteri kirgen.
— Biz bir jyl ishinde myńǵa jýyq tapsyrma oryndadyq. Onyń ishinde patrýldeý, beketterdi ornatý jáne jergilikti turǵyndarmen qarym-qatynasta bolý. Jarylǵysh zattardy anyqtap, olardy joıý jáne jergilikti turǵyndarǵa eskertý. Biz tolyqtaı bul tapsyrmalardy oryndadyq. Úshinshi ulttyq kontıngentine mindetterdi tapsyrdyq, — dedi Jánibek Nurlanov.
Eske salaıyq, keshe Almatydan Qazaqstannyń úshinshi ulttyq bitimgerlik kontıngentiniń ekinshi toby Golan jotasy aýmaǵyna attandy.
