Almatyda ǵımarattarǵa endi modemi bar sý eseptegishter ornatý mindetteledi
ALMATY. KAZINFORM - Almatyda turǵyn úı qoryn sý eseptegish quraldarymen qamtý deńgeıin arttyrý josparlanyp otyr. Qazir úıler men páterlerdiń shamamen 78%-y eseptegishpen jabdyqtalǵan. Kelesi jyly bul kórsetkishti 95%-ǵa jetkizý kózdelip otyr.
«Almaty Sý» málimetinshe, qalada sý esebin avtomattandyrylǵan júıege kóshirý jáne kórsetkishterdi qashyqtan berý kezeń-kezeńimen júzege asyrylady. Ákimshilik, ónerkásiptik jáne kommertsııalyq nysandardaǵy eseptegishterdi modemdik baılanys júıelerimen jabdyqtaýǵa talaptar engiziledi.
— Qala birtindep biryńǵaı avtomattandyrylǵan esep júıesine kóship jatyr. Qazir barlyq iri jáne jeke turǵan kásiporyn modemi bar eseptegishterge kezeń-kezeńimen aýystyrylyp jatyr. Sonymen qatar barlyq jańa nysanǵa modemi bar eseptegishter mindetti túrde ornatylýy kerek. Eseptegishterdi josparly nemese jospardan tys aýystyrý kezinde de modemi bar qural ornatý mindetti, — dedi óńirlik kommýnıkatsııalar brıfınginde «Almaty Sý» satý departamentiniń dırektory Serik Shagırov.
Jańa talaptar paıdalanýǵa beriletin nysandarǵa da qatysty. Jańa turǵyn úılerge, kommertsııalyq jáne basqa da ǵımarattarǵa kórsetkishterdi qashyqtan berýge múmkindik beretin eseptegishter ornatylady.
Tutynýshylar úshin eseptegishter naqty paıdalanylǵan sý kólemine qaraı tólem jasaýǵa jáne óz tutynýyn baqylaýǵa múmkindik beredi.
«Almaty Sý» málimetinshe, esep júıesin tsıfrlandyrý sýdy tutyný týraly dálirek aqparat alýǵa, júıeniń jekelegen ýchaskelerine túsetin júktemeni taldaýǵa, tutynýdyń qalyptan tys kólemin jáne yqtımal sý aǵýlaryn anyqtaýǵa múmkindik beredi.
Qashyqtan esepke alý júıesine kóshý Almatydaǵy sýmen jabdyqtaý júıesin keshendi tsıfrlandyrýdyń bir bóligi bolady. Bul sý óndirý men tasymaldaýdan bastap, onyń tutynylýyn esepke alýǵa deıingi úderisterdi qamtıdy.
Eske salaıyq, Almatyda 1 qazannan bastap sý tarıfteri ózgeretini habarlandy.
