Almatyda ǵylymı ázirlemelerge bólingen qarjynyń jymqyrylǵany anyqtaldy
ASTANA. KAZINFORM – Almatyda «Bal halal» JShS dırektory «Ǵylym qory» AQ-nyń ǵylymı jobalardy kommertsııalandyrýǵa bólgen 1,15 mlrd teńgesin jymqyrdy degen kúdikke ilindi.
QR Qarjylyq monıtorıng agenttigi baspasóz qyzmetiniń habarlaýynsha, qarjyny jymqyrý deregi boıynsha tergeý aıaqtalyp, kúdikti qamaýǵa alyndy.
QMA Almaty qalasy boıynsha departamenti prokýratýranyń úılestirýimen júrgizgen tergeý barysynda 2023–2024 jyldary kompanııa tórt jobany júzege asyrý úshin memleketten qarjy alǵany anyqtalǵan. Jobalar aıasynda ósimdik shıkizatynan ınnovatsııalyq makaron ónimderin jáne mıkronýtrıenttermen baıytylǵan un óndirý josparlanǵan.
Bólingen qarajatqa qajetti qural-jabdyq satyp alý, óndiristik orynjaılardy daıyndaý, shıkizat pen bólshekter alý, jabdyqtardy ornatý jáne jóndeý jumystaryn júrgizý kózdelgen. Alaıda tergeý kezinde satyp alynǵan jabdyqtardyń jobalarda kórsetilgen ónimderdi óndirýge jaramsyz ekeni anyqtaldy.
Qarajatty zańsyz shyǵarý úshin kúdiktimen baılanysy bar adamdardyń atyna tirkelgen «SMART 15» JShS paıdalanylǵan. Jabdyq satyp alý jáne túrli qyzmetterge aqy tóleý degen jeleýmen osy kompanııanyń esepshottaryna 736,4 mln teńge aýdarylǵan.
Budan bólek, iske «Fabrıka reklamy Shymkent», «Jana tan» JShS, «Sisters Brand KZ» jeke kásipkerligi jáne basqa da kásipkerlik sýbektileri tartylǵan.
-Tergeý dereginshe, jobalardyń oryndalýyn baqylaý jumystary is júzinde júrgizilmegen. Monıtorıng aktileri óndiris oryndaryna barmaı jáne atqarylǵan jumystardy teksermeı rásimdelgen. Qujattardy «Bal halal» JShS qyzmetkerleri daıyndap, monıtorıng toptarynyń músheleri qol qoıǵan. Osylaısha qarajattyń maqsatty jumsalýyn baqylaý júrgizilip jatqandaı kórinis jasalǵan,-delingen habarlamada.
Sonymen qatar kúdikti zańsyz qolma-qol aqshaǵa aınaldyrylǵan qarajattyń 88,5 mln teńgesin zańdastyrý maqsatynda «Bal halal» JShS esepshottaryna qolma-qol engizgen. Bul somany jobalardy birlesip qarjylandyrýǵa qosqan óz qarajaty retinde kórsetken.
Tergeý málimeti boıynsha, memleketke keltirilgen jalpy shyǵyn 945 mln teńgeni quraǵan.
Sot sanktsııasymen kúdiktiniń jalpy quny 830 mln teńge bolatyn múlkine tyıym salyndy. Onyń ishinde bes jer telimi, tórt avtokólik, Astanadaǵy páter, kommertsııalyq úı-jaı jáne zergerlik buıymdar bar.
Ózge málimetter Qylmystyq-protsestik kodekstiń 201-babyna sáıkes jarııalanbaıdy.
Aıta keteıik, keshe Quryltaı otyrysynda Joǵary aýdıtorlyq palata tóraǵasy Álıhan Smaıylov ǵylymı zertteýlerge jáne tájirıbelik-konstrýktorlyq jumystarǵa arnalǵan qarajat tolyq ǵylymǵa baǵyttalmaǵany týraly aıtty.
