Almatyda gaz quıý beketteriniń aldynda avtobýstar uzyn-sonar kezekte tur
ALMATY. KAZINFORM — Almatyda gaz quıý beketteriniń aldynda avtobýstardyń uzyn-sonar kezegi qalyptasty.
Áleýmettik jelilerde qala turǵyndary shahardyń ártúrli aýdandaryndaǵy gaz quıý beketterinde kezekte turǵan avtobýstardyń beınejazbasyn jarııalap jatyr. Almatylyqtardyń aıtýynsha, keıbir baǵyttar boıynsha qoǵamdyq kólikti 30–40 mınýtqa deıin kútý qajet.
Qala ákimdiginiń jaýabyna sáıkes, bul jaǵdaıǵa avtogaz toltyrý kompressorlyq stantsııalarynyń durys jumys istemeýi sebep bolǵan. Qazirgi ýaqytta 8 stantsııanyń tórteýi isten shyǵyp, tek beseýi shtattyq rejımde jumys istep tur. Sonyń saldarynan jumys istep turǵan beketterde kezek paıda boldy.
Qyzmet kórsetýshi uıymdardyń málimetinshe, qazirgi ýaqytta isten shyqqan stantsııalarda jóndeý-qalpyna keltirý jumystary júrgizilip jatyr. Stantsııalardyń birin iske qosý 29 shildege josparlansa, barlyq bekettiń jumysyn 31 shildege deıin tolyqtaı qalpyna keltirý kózdelgen.
— Týyndaǵan ýaqytsha qolaısyzdyqtar úshin keshirim suraı otyryp, jolaýshylardan jol júrýdi josparlaý kezinde qoǵamdyq kóliktiń qozǵalys kestesindegi yqtımal ózgeristerdi eskerýdi ótinemiz, — dep habarlady ákimdikten.
Eske salaıyq, Almatynyń Naýryzbaı batyr kóshesinde avtobýs jolaǵynyń ornyna velojolaq salynady.
