Almatyda gaz qubyry jarylyp, jeńil kólikke zaqym keldi
ALMATY. KAZINFORM — Almatyda Baızaqov jáne Buhar jyraý kósheleriniń qıylysynda gaz qubyry jaryldy.
Jelide jarylystan aýdarylyp qalǵan jeńil kóliktiń beınejazbasy jarııalandy.
«QazaqGaz Aimaq» AQ málimetinshe, «SantehKomplektGrýpp» merdiger uıymy ortasha qysymdy jańadan salynǵan jerasty gaz qubyryna qysym berý jumystaryn júrgizip jatqanda aýa qospasy shyǵyp, jarylys bolǵan. Oqıǵa saldarynan jol jabyny, aǵash jáne bir avtokólik zaqymdandy.
— Oqıǵa ornyna qalanyń barlyq tıisti apattyq qyzmetteri jedel jetti. Qazirgi ýaqytta atalǵan aýmaqta tekserý jumystary júrgizilip, bolǵan oqıǵanyń sebepteri anyqtalyp jatyr. Oqıǵa aýmaǵy qorshaldy, halyqqa eshqandaı qaýip tónip turǵan joq. Qaza tapqandar joq, — dep habarlady «QazaqGaz Aimaq» AQ.
Eske salaıyq, buǵan deıin TJM órt sóndirýshileri saıajaı qoǵamyndaǵy jarylys qaýpiniń aldyn aldy.