Almatyda gaz kompanııasy qyzmetkerleri tutynýshylardyń 168 mln teńgesin jymqyrǵan
ALMATY. KAZINFORM – Qarjylyq monıtorıng agenttigi Almaty oblysy boıynsha departamenti «Almatygazservıs-Holdıng» Aktsıonerlik qoǵamynyń qarjysyn jymqyrý faktisi boıynsha tergeýdi aıaqtaǵanyn málimdedi.
Atalǵan aktsıonerlik qoǵam óńirge tabıǵı gaz jetkizýmen aınalysady. Tergeý materıaldaryna saı kompanııa qyzmetkerleri eseptegish qurylǵylardyń kórsetkishterin tirkep, tutynýshylardan qolma-qol aqsha jınaýmen aınalysqan. Jınalǵan qarajatty olar materıaldyq jaýapty tulǵalarǵa tapsyrǵan.
Alaıda atalǵan jaýapty tulǵalar jınalǵan qarajatty zańdy túrde ótkizýdiń ornyna óz paıdalaryna jaratyp, tólem týraly aqparatty «SymphonyGAS» júıesinde jasyryp kelgen. Osylaısha, kompanııanyń dırektory, onyń orynbasary, aǵa operator jáne aǵa baqylaýshydan turatyn tulǵalar toby 2 jyl ishinde tutynýshylar tólegen 168 mln teńgeni ıemdengen.
Sot sanktsııasymen kúdiktilerdiń jalpy quny 165 mln teńge bolatyn múlkine (turǵyn úı, páter jáne avtokólik) tyıym salyndy.
QR Qylmystyq-protsestik kodeksiniń 201-babyna sáıkes, ózge aqparat jarııa etilmeıdi.
Aıta keteıik, ShQO-da memlekettiń 2 mlrd teńgeden astam qarjysyn jymqyrǵan 3 adam sottaldy.