15:15, 02 Maýsym 2025 | GMT +5
Almatyda gaz-aýa qospasy jarylyp, 1 adam qaza tapty
ALMATY. KAZINFORM — Almatyda gaz-aýa qospasy jarylyp, er adam qaza tapty.
Almaty qalalyq Tótenshe jaǵdaılar departamentiniń málimetinshe, 2 maýsym kúni saǵat 13:55 shamasynda Alataý aýdany, Shapaǵat shaǵyn aýdany Bııanhý kóshesinde gaz-aýa qospasy jaryldy.
— Turǵyn úıdiń qurylystaryn bólshekteý kezinde 1949 jyly týǵan er adamnyń denesi tabyldy. Jedel shtab qurylyp, mamandar jumys istep jatyr, - dep habarlady departamentten.
Eske salaıyq, 23 mamyr Almaty oblysy Qarasaı aýdanynyń Jibek Joly aýylynda ornalasqan un ónimderin óndirý tsehynyń aýmaǵynda jarylys bolyp, artynsha órt shyqqany týraly jazǵan edik.
Keıin denesiniń 70–80% kúıik shalǵan tórt adamnyń da aýrýhanada qaıtys bolǵany belgili boldy.