Almatyda Ǵashyqtar kúni «Qozy Kórpesh – Baıan sulý» spektakliniń premerasy ótedi
ALMATY. KAZINFORM – Ǵashyqtar kúni Almatydaǵy Muhtar Áýezov atyndaǵy qazaq ulttyq drama teatrynda «Qozy Kórpesh – Baıan sulý» spektakliniń premerasy usynylady. Osyǵan oraı spektakldiń jabyq kórsetilimi ótti.
Jabyq kórsetilim bastalmas buryn teatr dırektory, Qazaqstannyń eńbek sińirgen qaıratkeri Erkin Jýasbek, teatrdyń qoıýshy-rejısseri, Qazaqstannyń eńbek sińirgen qaıratkeri Áýbákir Rahımov, teatr akteri, Qazaqstannyń eńbek sińirgen qaıratkeri Ǵanı Quljanov, «Bayan Sulu» AQ prezıdenti Tımýr Sadyqov baspasóz máslıhatyn ótkizdi.
«Elimizde bıznes ókilderiniń ónermen, onyń ishinde teatrmen áriptestik aıasynda jumys isteýi kóp kezdese bermeıdi. Degenmen ondaı mysaldar bar. Bıyl taǵy sondaı ıgi sharýanyń basynda turmyz. Sebebi, uly jazýshymyz Ǵabıt Músirepovtiń «Qozy Kórpesh – Baıan Sulý» shyǵarmasy bizdiń qazaqstandyq iri brendtiń demeýshiligimen sahnaǵa shyqqaly tur. Búgin onyń jabyq kórsetilimi ótedi. Biz sondaı-aq demeýshimen aqyldasa kele, spektakldi alys-jaqyn shetelge shyǵarý máselesin de qarastyryp jatyrmyz», - dedi Erkin Jýasbek.
Ol «Qozy Kórpesh – Baıan Sulý» spektakli eń alǵash ret 1930 jyldary sahnalanǵanyn aıtty.
«Sodan beri ár rejısser ártúrli traktovkada qoıylymdy kórermenge usynyp keldi. «Qozy Kórpesh – Baıan Sulý» shyǵarmasy mahabbat úshtigine qurylǵan. Qozy, Baıan, Qodar birlestigi aqyn, jyrshylardyń aýyzynda neshe ǵasyrdan beri aıtylyp keledi. Sizder bilesizder, óner mahabbattan turady, al mahabbat talastan turady, osy dúnıeniń búgingi jastarǵa paıdasy, áseri bolady degen oıdamyz. Jastar qaıdaǵy bir túsiniksiz áýlıege teńelgen Valentınnen góri bizdiń Qozy, Tólegen, basqa da batyrlardan úlgi alýy kerek. Ǵashyqtar kúni qarsańynda qoıylymdy sahnalaýymyzdyń bir sebebi osynda», - dedi teatr dırektory.
Qoıýshy-rejısser, Qazaqstannyń eńbek sińirgen óner qaıratkeri Áýbákir Rahımov «Qozy Kórpesh – Baıan Sulý» shyǵarmasy teatr sahnasynda besinshi ret qoıylǵaly otyrǵanyn aıtty.
«Ár rejısser óz traktovkasyn jasaǵan. Alǵashqy qoıylymdarda Serke Qojamqulov, Kamal Karmysov, Sholpan Jandarbekova, Mahfýza apaılar rólderdi somdady. Odan keıin Ázirbaıjan Mámbetovtyń qoıylymynda Asanáli Áshimov, Ánýar Moldabekov, Ydyrys Noǵaıbaev sııaqty ártister oınady. Keıin Qaırat Súgirbekov degen jas rejısser ózindik traktovkasyn jasap, qoıdy. Jańa spektaklde túgel derlik jastar oınaıdy. Ózderińiz kórip, baǵa bere jatarsyzdar. Buryn oınaǵandardyń eshqaısyna uqsamastaı jańasha qyrynda kórsetýge tyrystyq. Jalpy buǵan deıin «Qozy Kórpesh – Baıan Sulý» spektakli sońǵy ret sahnaǵa 2002 jyly shyqqan bolatyn», - dedi Áýbákir Rahımov.
Tımýr Sadyqov qazaq óneriniń qara shańyraǵynda «Qozy Kórpesh – Baıan Sulý» spektakliniń sahnalanýy teatr ujymy men fabrıka arasyndaǵy jaqsy qarym-qatynastyń nátıjesi ekenin aıtty.
«Ǵashyqtar kúni ótetin spektakl premerasy barshańyzdyń kóńilińizden shyǵady degen úmittemiz», - dedi ol.
Akter, Qazaqstannyń eńbek sińirgen qaıratkeri Ǵanı Quljanov qoıylymda Aıdardyń rólin oınaıtynyn aıtty.
«Ol da Baıan sulýǵa ǵashyq bolǵan, Baıan sulýdyń qolyn suraǵysy kelgen azamattyń biri. Sondaı bir ádemi ról, ózime unaıtyn ról. Bul rólmen tabystyrǵan Áýbákir aǵaǵa rahmet aıtamyn. Bul spektakl laıyqty deńgeıde daıyndyqtan ótti dep aıta alamyn», - dedi akter.
Spektaklde M. Asaýbaı, Á. Bazarbaı, I. Qulmaǵambetova, G. Dosanova, B. Turys, B. Qoja, D. Júsip, G. Djakýpova, Sh. Asqarova, K. Shaıahmetova, A. Aǵymbaı, M. Absadykova, G. Ospanov, I. Mázimbaı, J. Tolǵanbaı, Q. Mamytqalıev, Ǵ. Quljanov, J. Sadyrbaev, N. Abılov, E. Turysov syndy akterler oınaıdy.
Spektakldiń qoıýshy-sýretshisi - M. Saparov, kıim sýretshisi - B. Ábdimanapova, baletmeıster - G. Mýhamedjanova, al sahna qozǵalysyn A. Baılın atqarady.
