Almatyda fotosessııa kezinde oqýshy ózenge qulap ketti
ALMATY. KAZINFORM — Tótenshe jaǵdaı Prohodnaıa shatqaly aýmaǵynda bolǵan.
Almaty qutqarý qyzmetiniń (109) málimetinshe, saǵat 15:35 shamasynda Prohodnaıa shatqaly aýmaǵynda fotosessııa uıymdastyrǵan mektep oqýshylarynyń biri Prohodnaıa ózenine qulap ketken.
— 18 oqýshy men synyp jetekshisi sý jaǵasynda fotosessııa ótkizip jatqan sátte, 9-synypta oqıtyn qyz taıyp, sýǵa túsip ketken. Oqıǵa ornyna dereý Almaty qalasynyń qutqarý qyzmetiniń qutqarýshylary attandy. Saǵat 15:56–da, qulap ketken jerden shamamen 500 metr tómen, bógettiń aldynda oqýshy sýdan shyǵaryldy, — dep habarlady Almaty qutqarý qyzmeti.
Qutqarýshylar alǵashqy medıtsınalyq kómekti oqıǵa ornynda kórsetip, zardap shekken oqýshyny jedel járdem brıgadasyna tapsyrǵan.
Eske salaıyq, buǵan deıin Almaty taýlarynda adasyp ketken eki týrıst qutqarylǵanyn jazǵanbyz.
