Almatyda FlyArystan ushaǵynan órt shyǵyp, bir adam zardap shekti
ALMATY. KAZINFORM – Almaty áýejaıynda FlyArystan kompanııasynyń ushaǵynan órt shyqty.
Air Astana tobynyń málimetine sáıkes, Almaty halyqaralyq áýejaıynda FlyArystan áýe kemesine josparly tehnıkalyq qyzmet kórsetý jumystary barysynda óndiristik oqıǵa bolǵan. Tehnıkalyq qyzmet kórsetý jumystary kezinde áýe kemesinen órt shyqqan.
- Órt áýejaıdyń jedel qyzmetteri tarapynan dereý sóndirildi. Air Astana tobynyń qyzmetkeri jaraqat alyp, oǵan medıtsınalyq kómek kórsetilgennen keıin aýrýhanadan shyǵaryldy. Oqıǵa kezinde áýe kemesiniń bortynda jolaýshylar da, ekıpaj músheleri de bolmaǵan, - delingen málimdemede.
Air Astana toby qazir áýe kemesi zaqym kólemin baǵalaý jáne qajetti jóndeý jumystaryn júrgizý úshin ol paıdalanýdan ýaqytsha alynyp tastalǵanyn atap ótti. Odan bólek óndiristik oqıǵanyń mán-jaılaryn anyqtaý boıynsha jumys júrgizilip jatyr.
Eske salaıyq, FlyArystan «Aqtaý-Dýbaı» reısin toqtatý merzimin 15 qyrkúıekke deıin uzartty.
