Almatyda festıvalge baılanysty kólik qozǵalysy shekteledi

ALMATY. KAZINFORM – Qazaqstan polıtsııasy kúnine arnalǵan «Polıtsııa – El qorǵany» festıvaline baılanysty Respýblıka saraıyna irgeles aýmaqta kólik qozǵalysyna jartylaı shekteý qoıylady.

Almaty qalalyq Polıtsııa departamentiniń málimetinshe, 27 maýsym kúni saǵat 19:00-den 23:00-ge deıin kólik qozǵalysy shekteledi.

Myna kósheler jabylady:

– Dostyq dańǵyly boıymen – Qurmanǵazy kóshesinen Sátbaev kóshesine deıin (eki baǵytta);

– Abaı dańǵyly boıymen – Dostyq dańǵylynan Nazarbaev dańǵylyna deıin (eki baǵytta).

– Festıvalge kelgen qonaqtardyń sanyn eskere otyryp, qoǵamdyq qaýipsizdikti qamtamasyz etý maqsatynda jol qozǵalysy rettelmek. Júrgizýshilerden óz baǵytyn aldyn ala josparlaýdy jáne ýaqytsha sharalarǵa túsinistikpen qaraýdy suraımyz,– delingen habarlamada.

Eske salaıyq, 31 mamyrdan 20 shildege deıin Bógenbaı batyr kóshesiniń bir bóligi, 31 mamyrdan 30 maýsymǵa deıin Túrksib aýdanynda Kotelnıkov kóshesiniń bir bóligi jabyldy. Sondaı-aq 1 maýsymnan bastap 20 tamyzǵa deıin Sátpaev kóshesimen Masanchı kóshesinen bastap Baıtursynov kóshesine deıin eki baǵytta jol jabyldy.

2 maýsymnan bastap 20 tamyzǵa deıin Ǵabdýllın kóshesinde Rımskıı-Korsakov kóshesinen bastap Nahımov kóshesine deıin eki baǵytta qozǵalys shekteldi. 

Odan bólek Almatyda ıAssaýı kóshesiniń bir bóligi 1 aıǵa jýyq jabyldy.