Almatyda et ónimderi naryq baǵasynan 10-15% arzan satylatyn jármeńke ótedi

ALMATY. KAZINFORM – Almatyda 21-22 qarasha kúnderi «Soǵym FEST» taqyryptyq jármeńkesi uıymdastyrylady, dep habarlady qala ákimdigi.

Astanada «Soǵym-FEST» bastaldy: etti deldalsyz satyp alýǵa bolady
Foto: Saýda mınıstrligi

Jármeńke Shevchenko kóshesiniń Pýshkın men Qonaev kósheleri aralyǵyndaǵy bóliginde ótedi.

Munda 100 tonnadan astam et ónimderi men 50 tonna aýyl sharýashylyǵy ónimderi saýdaǵa shyǵarylady. Olardyń qatarynda kókónister, sút jáne balyq ónimderi, shujyq ónimderi men bal bar.

Jármeńkege Shyǵys Qazaqstan, Almaty, Jambyl jáne Abaı oblystarynyń óndirýshileri qatysady.

– Ónim baǵasy naryqtaǵy ortasha baǵadan 10-15%-ǵa tómen bolady. Jármeńkeniń basty maqsaty – otandyq óndirýshilerden aýyl sharýashylyǵy ónimderin tutynýshylarǵa tikeleı jetkizýdi damytý jáne qalanyń azyq-túlik qaýipsizdigin qamtamasyz etý, – dep málimdedi uıymdastyrýshylar.

«Soǵym FEST» jármeńkesi eki kún boıy saǵat 08:00-den 18:00-ge deıin jumys isteıdi.

Aıta keteıik, 21-22 qarashada Astanada da «Soǵym-FEST» aýyl sharýashylyǵy jármeńkesi ótedi. Elordadaǵy úsh saýda alańynda otandyq fermerler et pen basqa da azyq-túlik ónimderin deldalsyz satady.