Almatyda esirtkimen ustalǵan jas jigit 10 jylǵa sottaldy
Almaty qalasynyń qylmystyq ister jónindegi mamandandyrylǵan aýdanaralyq sotynyń úkimimen 19 jastaǵy jigit 10 jylǵa bas bostandyǵynan aıyryldy, dep habarlaıdy Kazinform.
Osy jyldyń sáýir aıynda Medeý aýdanynda ornalasqan túngi klýbtardyń birinde jas jigit esirtkimen ustalǵan bolatyn.
«Túngi saǵat ekide klýbta 19 jastaǵy azamat T. Ustaldy. Onyń shalbarynyń qaltasynan kók tústi ızolentaǵa oralǵan, untaq pen kesek pishindi, ashyq tústi sıntetıkalyq zat salynǵan úsh orama tabyldy. Jumys nusqalarynyń birine sáıkes, bul mefedron esirtkisi ekeni anyqtaldy. Keıin tergeý materıaldary sotqa joldandy», – dedi Almaty qalalyq Polıtsııa departamenti esirtki qylmysyna qarsy kúres basqarmasynyń bastyǵy Erlan Álmaǵambetov.
Polıtsııa ókiliniń aıtýynsha, Almaty qalasynyń qylmystyq ister jónindegi mamandandyrylǵan aýdanaralyq sotynyń úkimimen 19 jastaǵy turǵyn QR Qylmystyq kodeksiniń 297-baby 3-bóliginde kózdelgen qylmysty jasaǵany úshin kináli dep tanylyp, 10 jylǵa sottaldy.
