Almatyda esirtkimen kúres qalaı júrip jatyr
ALMATY. KAZINFORM – Almatyda «Narkostop» jobasy sheńberinde jyl basynan beri esirtki jarnamasy beınelengen 50 myńǵa jýyq graffıtı boıalǵan.
Memleket basshysy Qasym-Jomart Toqaev 2022 jyldyń 1 qyrkúıeginde Qazaqstan halqyna joldaǵan Joldaýynda sıntetıkalyq esirtkiniń qoǵamǵa qaýpi týraly aıtyp, tıisti vedomstvoǵa nashaqorlyqpen jáne esirtki saýdasymen kúresýdiń keshendi josparyn ázirleýdi tapsyrǵan bolatyn. Bıyl Atyraý qalasynda ótken Ulttyq quryltaı kezinde Prezıdent halqymyzǵa qaýip tóndiretin 5 keseldiń qatarynda esirtki saýdasy men nashaqorlyq máselesin taǵy da qozǵap ótti.
Prezıdent tapsyrmasyna oraı elimizdiń eń iri megapolısi – Almatyda nashaqorlyq jáne sıntetıkalyq esirtkimen kúres qalaı júrip jatqanyn Almaty qalasy Polıtsııa departamenti Esirtki qylmysyna qarsy is-qımyl basqarmasynyń aǵa jedel ýákili polıtsııa maıory Dáýren Kóbeev aıtyp berdi.
«Memleket basshysy 2 jyl burynǵy Joldaýynda esirtki máselesin qozǵap ótken bolatyn. Prezıdent tapsyrmasyna oraı 2023 jyldyń 29 maýsymynda «Qazaqstan Respýblıkasynda Nashaqorlyqqa jáne esirtki bıznesine qarsy kúrestiń 2023 - 2025 jyldarǵa arnalǵan keshendi jospary» bekitilgen bolatyn. Bul aldyn ala boljam boıynsha sıntetıkalyq esirtki qoldanysyn 5-6%-ǵa azaıtýy qajet», – dedi polıtsııa maıory.
Dáýren Kóbeevtiń aıtýynsha, qazir esirtki saýdasynyń kezekti tolqyny júrip jatyr. Polıtsııa maıory ony toqtatýdyń joly esirtki bıznesine qarjylaı soqqy jasaý ekenin aıtady.
«Qazaqstanda esirtki saýdasynyń alǵashqy tolqyny toqsanynshy jyldary boldy, 2000 jyldary geroın saýdasy beleń aldy. Qazir sıntetıkalyq esirtki tarap jatyr. Biz adamdardy saqtandyratyn arnaıy beınerolıkter jasap júrmiz. Biraq qazir áleýmettik jelilerde aqparat aǵyny óte qarqyndy. Búgin kórilgen beınerolık erteń umytylyp ketedi. Biz oqý oryndarynda túsindirý jumystaryn júrgizemiz. Biraq bul da jetkiliksiz, jastardyń oıynan shyqpaýy úshin bizge úlken qarqyn men algorıtm qajet. Esirtki bıznesi nelikten bizden bir qadam alda júredi? Sebebi onda mıllıardtaǵan aqsha aınalymy bar. Bizdiń tonnalap esirtkini tárkileýimiz de úlken nátıje bermeıdi. Batystyń tájirıbesine qarasaq, olar esirtki saýdasyna qarjy jaǵynan soqqy beredi. ıAǵnı, qarjylyq barlaý qyzmetteriniń jumysyn kúsheıtý kerek», – dedi Dáýren Kóbeev.
Almaty qalasynda qala ákimdigi men Polıtsııa departamentiniń is-qımyldarynan bólek esirtkige qarsy kúres jumysy «Narkostop» jobasy aıasynda iske asady. Aıtylǵan joba Almatyda alǵash ret 2021 jyly iske qosyldy. Graffıtıdi boıaýdan bastalǵan joba búginde óziniń baǵyttaryn keńeıtip, esirtki bıznesinen qarsy jan-jaqty kúres júrgizedi.
«Narkostop» jobasynyń baǵyttaryn esirtki jarnamasyn boıaý, kıbervolonterlik, ǵylymı zertteý, oqý oryndaryndaǵy lektsııa men profılaktıkalyq jumys dep bólýge bolady. Birinshi baǵyt aıasynda esirtki jarnamasy beınelengen graffıtıler boıalady. Kıbervolonterlik jumys barysynda esirtkini nasıhattaıtyn onlaın resýrstar anyqtalyp, quzyretti organdarǵa habarlanady. Al jobanyń ǵylymı zertteý baǵyty esirtkige qarsy kúrestiń tıimdi tásilderin taýyp, qoldanystaǵy tetikterdi ońtaılandyrýǵa múmkindik beredi. Qalǵan eki baǵyt boıynsha oqý oryndarynda jastarǵa esirtkiniń zııany jóninde aqparat beriledi jáne ártúrli mekemelerde trenıng, dóńgelek ústel syndy jıyndar uıymdastyrylady», – dedi «Narkostop» jobasynyń kýratory Nurjan Jakýpov.
«Narkostop» jobasynyń kýratory 2024 jyldyń basynan beri megapolıste esirtki jarnamasy beınelengen 50 myńǵa jýyq graffıtı boıalǵanyn aıtty.
«Joba aıasynda jyl basynan beri oqý oryndarynda 32 dáris ótkizildi. Volonterlerdiń jáne Esirtki qylmysyna qarsy is-qımyl basqarmasynyń kómegimen 50 myńǵa jýyq graffıtı boıalyp, esirtki jarnamalary joıyldy. Sondaı-aq jumys toby tarapynan ǵylymı zertteý jumystary júrgizilip jatyr. Nashaqor adamdar ýaqyt óte kele óz- ózderin basqara almaıtyn ashýshań adamdarǵa aınalady jáne olar jıi ózderiniń jaqyndaryna, qart ata-analaryna qol kóteredi. Osyndaı jaǵdaıda esirtkige táýeldi adamdy májbúrlep emdeýge jatqyzý úshin de biz quqyqtyq kómek kórsetemiz. Bıyl 50-den astam adam bizdiń mamandardan quqyqtyq kómek alyp úlgerdi. Biz Almaty qalasynyń psıhıkalyq densaýlyq ortalyǵy jáne Almaty qalasy PD Esirtki qylmysyna qarsy is-qımyl basqarmasymen seriktes retinde tyǵyz jumys isteımiz», – dedi ol.
