Almatyda esirtkige táýeldi adamdardyń sany azaıdy
ALMATY. KAZINFORM — Almatyda esepte turǵan esirtkige táýeldi adamdar azaıdy. Qazir narkologtardyń baqylaýynda 1 148 adam bar, bul byltyrmen salystyrǵanda 2% az. Jyl basynan beri 300-den astam adam statsıonarlyq em qabyldap, onyń ishinde 19 naýqas esepten shyǵaryldy.
Psıhıkalyq densaýlyq ortalyǵy dırektorynyń narkologııalyq qyzmet jónindegi mindetin atqarýshy orynbasary Aıgúl Ábdikerovanyń aıtýynsha, qaladaǵy nashaqorlyq kórsetkishi 100 myń turǵynǵa shaqqanda — 47,9 adam. Byltyr bul kórsetkish joǵary bolyp, 100 myń turǵynǵa shaqqanda 50,8 adam bolǵan. Esepte turǵan kámeletke tolmaǵandardyń sany da 17-den 12 adamǵa deıin edáýir azaıypty.
— Biz oń dınamıkany baıqap otyrmyz. Buǵan tek emdeý sharalary emes, belsendi profılaktıkalyq jumystar da yqpal etip jatyr. Esirtkini qoldanýdyń saldary týraly aqparat alatyn adamdar sany artyp, olar der kezinde kómekke júgine bastady. Em neǵurlym erte bastalsa, tolyq saýyǵyp ketý múmkindigi de soǵurlym joǵary bolady, — deıdi Aıgúl Ábdikerova.
Bıylǵy alǵashqy bes aıda esirtkige táýeldi 63 adam esepke alyndy, onyń ishinde kámeletke tolmaǵan bir jasóspirim de bar. Osy ýaqytta 65 adam baqylaýdan, tolyq saýyqqan 19-y esepten shyǵarylypty.
Psıhıkalyq densaýlyq ortalyǵynyń málimetinshe, bıylǵy bes aıda esirtkige táýeldiligi bar 300-den astam adam statsıonarlyq em qabyldaǵan.
Maýsym aıynda Almatyda Nashaqorlyq pen esirtkiniń zańsyz aınalymyna qarsy halyqaralyq kúnge oraı birneshe is-shara ótpekshi. Atap aıtqanda, 5 maýsym kúni saǵat 09:00–de Medeý aýdany ákimdigi men «Narkostop» uıymyn birlesip «Esirtkisiz ómir» atty fleshmob uıymdastyrady. Aktsııa barysynda turǵyndar psıhologtar men dáriger-narkologtardan keńes ala alady.
19 maýsym kúni saǵat 09:00–den 13:00–ge deıin Maqataev kóshesi, 10 mekenjaıynda ornalasqan Psıhıkalyq densaýlyq ortalyǵynda Ashyq esik kúni ótpek. Barlyǵy mamandardan tegin keńes alyp, ózderin mazalaǵan suraqqa jaýap ala alady.
Eske salaıyq, buǵan deıin Úkimet esirtkige qarsy kúres boıynsha jańa sharalardy qolǵa alǵanyn habarlaǵan edik.
