Almatyda esirtkige qarsy jańa mýral paıda boldy
ASTANA. KAZINFORM — Aýqymdy art-nysan Maqataev pen Panfılov kósheleriniń qıylysynda ashyldy, dep habarlaıdy qalalyq polıtsııa departamentiniń baspasóz qyzmeti.
— Bul — jaı ǵana kóshe sýreti emes. Bul ár adamnyń óz tańdaýy bar ekenin eske salatyn mańyzdy úndeý: erkin ómir súrý, sportpen aınalysý, shyǵarmashylyqpen aınalysý, bilim alý, armanyńa umtylý ma, álde bolashaqtan aıyratyn esirtkige táýeldilikke túsý me. Mýraldaǵy kórkem beıneler salaýatty ómir salty men jarqyn bolashaqtyń qundylyqtaryn esirtkiniń adam ómirin kúıretetin zardaptaryna qarsy qoıady, — deıdi tártip saqshylary.
Vedomstvonyń málimetinshe, osyndaı áleýmettik art-jobalar polıtsııanyń jastar arasynda esirtkige qarsy berik ustanym qalyptastyrýǵa jáne salaýatty ómir saltyn nasıhattaýǵa baǵyttalǵan júıeli profılaktıkalyq jumysynyń bir bóligi.
Buǵan deıin Almatyda páterden tolyq jabdyqtalǵan esirtki zerthanasy tabylǵany belgili boldy.
