Almatyda esirtki tasyǵan 19 jasar jigit 10 jylǵa sottaldy

ALMATY. KAZINFORM – Almaty qalasynyń qylmystyq ister jónindegi mamandandyrylǵan aýdanaralyq sotynda psıhotroptyq zattardy zańsyz ıemdenip, saqtaǵan jas jigitke qatysty qylmystyq is qaraldy.

Almaty sotynyń málimetine sáıkes, 2023 jyldyń qazan aıynda P. turaqty tabys kózi bolmaǵandyqtan, jeńil túrde paıda tabý úshin Telegram kanal arqyly 12,04 gramm mólsherinde psıhotroptyq zattardy zańsyz ıemdengen. Keıin ony óziniń avtokóliginde saqtaǵan. Sol kúni polıtsııa qyzmetkerleri P.-nyń avtokóligin toqtatyp, tintý barysynda 25 dana psıhotroptyq zattar tárkilengen.

Sot protsessi kezinde sottalýshy óz kinásin moıyndamady. Prokýror sottalýshyǵa 11 jylǵa bas bostandyǵynan aıyrý jazasyn taǵaıyndaýdy surady.

- Alqabılerdiń qatysýymen shyǵarylǵan sottyń úkimine sáıkes, P.-nyń adamdar tobynyń aldyn ala sóz baılanysýymen asa iri mólsherde psıhotroptyq zattardy ótkizý maqsatynda zańsyz ıemdengendigi jáne saqtaǵany dáleldendi. Jeńildetetin mán-jaı retinde onyń jasy (19 jas) tanyldy. Sottalýshyǵa 10 jylǵa bas bostandyǵynan aıyrý jazasy taǵaıyndaldy, - dep habarlady sot baspasóz qyzmeti.

Úkim zańdy kúshine engen joq.