Almatyda esirtki taratyp júrgen Pákistan men Úndistannyń azamattary ustaldy
ALMATY. KAZINFORM – Almatyda arnaıy operatsııa barysynda sheteldikterdiń qylmystyq is-árekettteri áshkerelendi.
Almaty qalalyq polıtsııa departamentiniń málimetinshe, qalada Pákistan men Úndistannan kelgen eki azamaty esirtki bıznesimen aınalysqan. Olardyń biri Almatydaǵy joǵary oqý oryndarynda oqıdy.
«Ózderiniń qylmystyq áreketin júzege asyrý úshin kúdiktiler jeke turǵyn úıdi jalǵa alǵan. Turǵyn úıdi tintý kezinde satýǵa daıyn asa iri kólemdegi sıntetıkalyq esirtki, zerthanalyq jabdyqtar, prekýrsorlar tabylyp, tárkilendi. Sheteldikterdiń birlese jumys istegeni anyqtaldy, olardyń biri esirtkini qaınatsa, ekinshisi ony jasyryp qoıý arqyly taratqan. Іzdestirý sharalary qaskóılerdiń turǵylyqty jerinde de júrgizildi. Olar sıntetıka salynǵan oramdardy jatyn bólmesinde saqtaǵan. Tárkilengen sıntetıkalyq psıhotroptyq zattardyń jalpy salmaǵy 4 keliden asty. Kúdiktiler qamaýǵa alyndy», – dedi Almaty qalalyq polıtsııa departamenti bastyǵynyń orynbasary Qýatbek Naýatov.
Eske salsaq, Batys Qazaqstan, Abaı oblystary men Almaty qalasynda esirtkini eshqandaı baılanyssyz tásilmen taratýǵa mamandanǵan uıymdasqan qylmystyq toptar ustaldy.
