Almatyda esirtki saýdasyna daıyndalǵan 130 orama tárkilendi
ASTANA. KAZINFORM — Almaty men Almaty oblysynda polıtsııa esirtki taratýmen aınalysqan kúdiktilerdi ustady. Jedel sharalar barysynda 2 keli mefedron jáne esirtkini bólshektep satýǵa daıyndalǵan 130 orama tárkilendi. Bul týraly Polisia.kz jazdy.
— «Zań men Tártip» qaǵıdatyn iske asyrý aıasynda Іshki ister mınıstrligi esirtki quraldaryn jetkizý jáne taratý arnalarynyń jolyn kesýge baǵyttalǵan maqsatty is-sharalardy jalǵastyrýda. Almaty qalasynda esirtki qylmysyna qarsy is-qımyl bólinisiniń qyzmetkerleri 33 jastaǵy er adamdy ustady. Onyń avtokóligin tintý barysynda untaq tárizdi zat salynǵan 130 orama tabylyp, tárkilendi. Kúdiktiniń turǵylyqty jerin tekserý kezinde esirtki quraldary, elektrondyq tarazy, qaptama materıaldary jáne tyıym salynǵan untaqty bólshektep oraýǵa arnalǵan ózge de zattar tárkilendi. Sonymen qatar Almaty oblysynda iri kólemdegi esirtki partııasy jasyrylǵan taǵy bir oryn anyqtaldy. Tárkilengen zattyń jalpy kólemi eki kılogramm mefedrondy qurady, bul 10 myń bir rettik dozaǵa teń. Іri partııa polıtsııa qyzmetkerleriniń jedel áreketiniń arqasynda zańsyz aınalymǵa túspeı, tutynýshylarǵa jetken joq. Ustalǵan azamat kinásin tolyq moıyndady. Atalǵan fakti boıynsha Qazaqstan Respýblıkasy Qylmystyq kodeksiniń 297-babymen sotqa deıingi tergep-tekserý bastaldy. Kúdikti ýaqytsha ustaý ızolıatoryna qamaldy. Oǵan 12 jylǵa deıin bas bostandyǵynan aıyrý jazasy kózdelgen. Іshki ister mınıstrligi esirtkiniń zańsyz aınalymyna jáne ony taratý áreketterine qatań tosqaýyl qoıý jumystaryn jalǵastyrady. Osy baǵyttaǵy jumys turaqty negizde júrgizilýde, — dedi ІІM esirtki qylmysyna qarsy is-qımyl komıtetiniń basqarma bastyǵy Baqytjan Ámirhanov.
Eske sala keteıik, buǵan deıin UQK jyl basynan beri esirtki jetkizýdiń 44 arnasy joıylǵanyn habarlaǵan bolatyn.
