Almatyda esirtki saýdasymen aınalysqan úsh aǵaıyndy ustaldy
ALMATY. KAZINFORM – Almatyda esirtki saýdasymen aınalysqan toptyń joly kesildi.
Qalalyq polıtsııa departamentiniń málimetinshe, jedel-izdestirý sharalary barysynda bir-birine týys bolyp keletin úsh azamat ustaldy. Tergeý málimetteri boıynsha olar top quryp, zańsyz shemada árkim óz qyzmetin atqarǵan.
Kúdiktilerdi jeke tintý, sondaı-aq olardyń turǵylyqty jeri men qylmys jasaǵan oryndaryn tekserý kezinde zańsyz aınalymnan sıntetıkalyq tektes zattar salynǵan túıinshekter men ósimdik tektes esirtki zattary tárkilendi.
- Esirtkini ólshep-oraýǵa jáne satýǵa daıyndaýǵa arnalǵan elektrondy tarazylar, qaptama materıaldary men ózge de zattar tabyldy. Tárkilengen zattardyń jalpy kólemi asa iri partııaǵa jatady. Qazirgi ýaqytta olar sot saraptamasyna jiberildi, - dep habarlady departamentten.
Odan bólek tártip saqshylary qala aýmaǵynda esirtki taratý úshin aldyn ala daıyndalǵan jasyryn oryndardy anyqtaǵan.
Eske salaıyq, buǵan deıin Almatyda 20 jastaǵy kýrerden 2,5 keli esirtki tárkilendi.
