Almatyda esirtki plantatsııasyn uıymdastyrǵan eki kúdikti ustaldy

ALMATY. KAZINFORM – Almaty qalasynda nysanaly jedel-izdestirý is-sharalary barysynda quramynda esirtkisi bar ósimdikterdi ósirýge arnalǵan jasyryn fıtozerthananyń qyzmeti toqtatyldy. Bul týraly QR Іshki ister mınıstrliginiń baspasóz qyzmeti habarlady. 

Arnaıy operatsııa esirtki qylmysyna qarsy is-qımyl basqarmasynyń qyzmetkerleri men polıtsııanyń arnaıy jasaǵynyń birlesken jumysy nátıjesinde júzege asyryldy.

Jalǵa alynǵan turǵyn úıde kannabıs tobyna jatatyn ósimdikterdi ósirýge arnalǵan jaryqtandyrý jáne jeldetý júıesimen jabdyqtalǵan arnaıy termopalatkalar ornatylǵany anyqtaldy. Tintý barysynda esirtkisi bar ósimdik butalary, keptirilgen ósimdik tektes zat, tuqymdar, elektrondy tarazylar, oraýǵa arnalǵan materıaldary, keptirý jáne ósirý qural-jabdyqtary, sondaı-aq ulttyq jáne shetel valıýtasyndaǵy aqsha qarajaty tárkilendi.

Zańsyz óndiristi uıymdastyrdy degen kúdikpen eki er adam ustaldy. Olar ýaqytsha ustaý ızolıatoryna qamaldy. Qajetti sot saraptamalary taǵaıyndalyp, sotqa deıingi tergep-tekserý amaldary júrgizilip jatyr. 

Almaty qalasy polıtsııa departamenti esirtki qylmysyna qarsy is-qımyl basqarmasynyń bastyǵy Murat Jumabaev mundaı derekterdi anyqtaý jumystary jalǵasatynyn atap ótti. 

– Biz esirtkini zańsyz ósirý men taratýdyń barlyq arnasyn júıeli túrde anyqtap, jolyn kesemiz. Quramynda esirtkisi bar zattardy óndirýge baǵyttalǵan kez kelgen áreket qatań túrde toqtatylady. Bul – azamattardyń qaýipsizdigi men jastardy qorǵaý máselesi, - dedi ol.

Polıtsııa ókilderi megapolıste esirtki qylmysyna qarsy is-sharalar júıeli negizde jalǵasyp jatqanyn habarlady.

Budan buryn Aqtóbede iri kólemdegi sıntetıkalyq esirtki tárkilengenin habarlaǵan edik.