Almatyda Eskendir Hasanǵalıevtiń jeke mýzeı buryshy ashyldy
ALMATY. KAZINFORM – Almaty qalasynyń memlekettik arhıvinde QR halyq ártisi, kompozıtor, ánshi Eskendir Hasanǵalıevtiń qurmetine mýzeı buryshy ashyldy. Onda otbasy tabys etken kompozıtordyń ómiri men shyǵarmashylyǵyna baılanysty 100-den astam qujat pen eksponat qoıyldy.
Іs-sharaǵa Almaty qalasynyń mádenıet basqarmasy, belgili zııaly qaýym ókilderi, Eskendir Hasanǵalıevtiń otbasy, týǵan-týys, jaqyn dostary men jas ónerpazdar qatysty.
«Arhıv – bul halyqtyń rýhanı baılyǵy men mádenı murasyn saqtaıtyn, bolashaq urpaqqa mıras etetin mańyzdy býyn. Búgin Almaty qalasynyń arhıvi Eskendir Hasanǵalıevtiń jeke qorynan alynǵan baǵaly qujattarmen jáne zattarmen tolyqtyryldy. Bizdiń ortaq mindetimiz – týǵan jerge jáne óz halqyna degen súıispenshilikti beıneleıtin kompozıtordyń shyǵarmalaryn saqtaý jáne nasıhattaý», - dedi Almaty qalasy Mádenıet basqarmasynyń basshysy Ǵanı Maılybaev.
QR Halyq ártisiniń jubaıy Darıko Hasanǵalıeva kompozıtordyń shyǵarmashylyǵy men eńbegi halyqqa tıesili ekenin jetkizdi.
«Eskendir Ótegenulynyń shyǵarmashylyǵy men eńbegi halyqqa tıesili. Endi qazaqstandyq estrada ańyzynyń qoljazbalary, nagradalary, fotoalbomdary, syılyqtary, kitaptary, ordenderi men medaldary osynda saqtalady, óskeleń urpaq qajet bolǵan jaǵdaıda tanysa alady. Otbasymyzdyń atynan mýzeı buryshyn ashý jónindegi osy ıgi bastamany qoldaǵany úshin barlyǵyna alǵys bildiremin», - dedi Darıko Hasanǵalıeva.
Áıgili ánshi, kompozıtor, Qazaq KSR-niń Halyq ártisi, Qazaqstan Respýblıkasynyń Memlekettik syılyǵynyń, «Qurmet», «Otan» ordenderiniń ıegeri Eskendir Hasanǵalıev 2021 jyly koronavırýstan qaıtys boldy.
Eskendir Ótegenuly Hasanǵalıev 1940 jyly 13 aqpanda Batys Qazaqstan oblysynda týǵan. 1959 jyly Qurmanǵazy atyndaǵy Almaty memlekettik konservatorııasynyń vokaldy-hor fakýltetin, 1978 jyly ál-Farabı atyndaǵy Shymkent mádenıet ınstıtýtyn bitirdi. Ómirin ónerge arnaǵan Hasanǵalıevtiń «Atameken», «Ádemi», «Asyl arman», «Ómirimniń jazy», «Eskirmegen mahabbat» ánderin bilmeıtin qazaq joq.
