Almatyda Eskendir Hasanǵalıevtiń 85 jyldyǵyna arnalǵan kórme ashyldy
ALMATY. KAZINFORM – Almaty mýzeıinde Eskendir Hasanǵalıevtiń 85 jyldyǵyna arnalǵan «Atameken» – el rýhy» atty kórme ashyldy.

Kórmege qazaq án óneriniń altyn qoryna mol mura qaldyryp ketken áıgili kompozıtor, talantty ánshi, QR Memlekettik syılyǵynyń ıegeri, Qazaqstannyń halyq ártisi Eskendir Hasanǵalıevtiń ómiri men shyǵarmashylyǵynan syr shertetin zattar qoıylǵan.

Atap aıtar bolsaq, kompozıtordyń jeke zattary men fotosýretteri, marapattary, sahnalyq kostıýmderi, partıtýralary, mýzykalyq aspaptary, afıshalar jáne otbasylyq zattary tur.



Kórmeniń saltanatty ashylýyna Almaty qalasy mádenıet basqarmasy ókilderi, zııaly qaýym, óner qaıratkerleri, qala turǵyndary, dostary, týysqandary kompozıtordyń jary Darıko Hasanǵalıeva men uly Birjan Hasanǵalıev qatysty.

– Eskendir Hasanǵalıev tiri bolsa, bıyl 85 jasqa tolar edi. Eskendir Hasanǵalıevtiń shyǵarmashylyǵyn qurmettep, osyndaı keremet kórme uıymdastyrǵandarǵa erekshe alǵysymdy bildiremin. Halyq óner men shyǵarmashylyqty baǵalaǵan kezde belgili kompozıtordyń esimi óshpeıtinine senemin, – deıdi Darıko Hasanǵalıeva.
Qazaqstannyń beıresmı ánuranyna aınalǵan «Atameken» ániniń shyqqanyna 55 jyl.


Shara barysynda kópshiliktiń suraýy boıynsha, kompozıtordyń uly Birjan Hasanǵalıev «Atameken» ánin oryndap berdi.

Eskendir Ótegenuly Hasanǵalıev 1940 jyly 13 aqpanda Batys Qazaqstan oblysynda týǵan. 1959 jyly Qurmanǵazy atyndaǵy Almaty memlekettik konservatorııasynyń vokaldy-hor fakýltetin, 1978 jyly Ál-Farabı atyndaǵy Shymkent mádenıet ınstıtýtyn bitirdi. Ómirin ónerge arnaǵan Hasanǵalıevtiń «Atameken», «Ádemi», «Asyl arman», «Ómirimniń jazy», «Eskirmegen mahabbat» ánderin bilmeıtin qazaq joq.





Onyń repertýaryndaǵy avtorlyq týyndylary el júreginen oıyp turyp oryn alǵan.Shyǵarmashylyq ǵumyrynda orys, tatar, nemis aqyndarynyń óleńderine de án jazǵan. 200-ge jýyq án, romans jáne horǵa arnalǵan shyǵarmalardyń avtor boldy.


Eske salaıyq, Eskendir Hasanǵalıev 2021 jyly koronavırýstan kóz jumdy.