Almatyda eski úıleri buzylǵan 200 otbasy páter kiltin aldy
ALMATY. KAZINFORM – Jyl basynan beri eski úıde turǵan 220-dan astam almatylyq jańa páterge kóshken.
Almaty ákimdiginiń málimetinshe, qonys aýdarý jumystaryn qala basshylyǵyna qarasty «Qalalyq kúrdeli qurylys kásiporny» JShS jáne ınvestorlar «Almaty qalasynyń turǵyn úıdi jańartý baǵdarlamasy - 2030» aıasynda júzege asyryp otyr.
– Almatylyqtar jańa baspanany «bólme ornyna bólme» qaǵıdaty boıynsha nemese burynǵy turǵyn úıiniń naryqtyq qunyna sáıkes ótemaqy alý arqyly ıelendi. Jańartý baǵdarlamasy aıasynda barlyq páter ishki árleýmen beriledi. Onda ınternet júrgizilip, órtke qarsy dabyl júıesi, santehnıka, gaz nemese elektr plıtasy ornatylǵan, - dep habarlady ákimdikten.
Aýdan arasynda: Túrksib aýdanynda – 99 adam, Almaly aýdanynda – 57, Jetisý aýdanynda – 32, Áýezov aýdanynda – 20, Bostandyq aýdanynda – 7, Alataý aýdanynda – 3 jáne Medeý aýdanynda – 2 adam jańa páterge qonystandy.
Baǵdarlamaǵa sáıkes, kóshirý jáne ǵımarattardy súrý jumystary barlyq menshik ıeleriniń kelisimimen ǵana júrgiziledi. Erekshe kútimdi qajet etetin adamdar úshin birinshi qabattaǵy nemese jedelsaty, pandýs jáne kedergisiz qoljetimdiligi bar úılerden páter qarastyrylǵan.
– Qala turǵyndarynyń qaýipsizdigin qamtamasyz etý maqsatynda, ásirese karkas-qamysty úıler men tektonıkalyq jaryq aımaǵynda ornalasqan ǵımarattardy súrýge erekshe kóńil bólinedi. Turǵyndar berilgen baspanaǵa kóshýden bas tartqan jaǵdaıda eski úıde tura beredi, biraq qaýip-qaterge ózi jaýapty bolady, - dep málimdedi Almaty ákimdigi.
Bıyl jyl sońyna deıin «Qalalyq kúrdeli qurylys kásiporny» men ınvestorlardyń kúshimen taǵy 600-den astam adamdy jańa turǵyn úımen qamtamasyz etý josparlanyp otyr.
– 2030 jylǵa deıin qaladaǵy eski úılerdiń sanyn 1 366-dan 690-ǵa deıin azaıtyp, shamamen 7 500 menshik ıesin zamanaýı páterge kóshirý josparlanyp otyr, - dedi «Qalalyq kúrdeli qurylys kásiporny» JShS basqarma tóraǵasy Rınat Qurmanov.
Buǵan deıin Almatyda qansha eski úı súriletinin jazǵanbyz.
Eske salaıyq, Almatydaǵy eski úılerdiń 40%-dan astamy Túrksib aýdanynda ornalasqan.