Almatyda eski turǵyn úılerdi jóndeýdiń jańa mehanızmi iske qosyldy
ALMATY. KAZINFORM - Almatyda óńirlik kommýnıkatsııalar qyzmetiniń alańynda ótken baspasóz máslıhatynda qurylysty salyp bitiretinine kepildik beretin turǵyn úıdi renovatsııalaý tetigi talqylandy.
«Qazaqstannyń turǵyn úı kompanııasy» AQ basqarma tóraǵasynyń orynbasary Islambek Qaıyrbekovtiń aıtýynsha, apatty jaǵdaıdaǵy turǵyn úılerdi renovatsııalaýdyń jańa tetigi Biryńǵaı operatorǵa qurylys jumysyn aıaqtaýǵa kepildik beredi. Osylaısha menshik ıelerin aýmaǵy týra sondaı jańa turǵyn úıge kóshiredi.
Muny Ónerkásip jáne qurylys mınıstrligi men «Qazaqstannyń turǵyn úı kompanııasy» AQ birlesip ázirlegen. Ol turǵyn úı qurylysyna úlestik qatysý týraly qoldanystaǵy zańnamaǵa negizdeldi. Zańnamaǵa 2026 jylǵy 12 naýryzdan bastap ózgeris enip, qurylys kodeksiniń jekelegen normasy bıyl 1 shildeden bastap qoldanysqa endi. Maýsym aıynda jańartý aıasynda kepildik berýdi retteıtin qalǵan normatıvtik-quqyqtyq aktiler bekitildi.
- Negizgi qaǵıdattyń biri – «bólme ornyna bólme» formaty. Menshik ıesine kólemi týra sondaı jańa úı beriledi. Apatty jaǵdaıdaǵy jáne tozǵan turǵyn úıdi naryqtyq quny boıynsha satyp alý múmkindigi de qosa qarastyrylǵan. Bul rette kepildik jaǵdaıy týyndaǵan kezde Biryńǵaı operator qurylystyń aıaqtalýyna kepildik beredi, – dedi Islambek Qaıyrbekov.
Bastamany iske asyrýǵa jergilikti atqarýshy organdar, ınvestor nemese qurylys salýshy, «Qazaqstannyń turǵyn úı kompanııasy» AQ jáne apattyq jaǵdaıdaǵy ári tozyǵy jetken turǵyn úıdiń menshik ıeleri qatysady. Jergilikti atqarýshy organdar renovatsııa aımaǵyn aıqyndap, nysandardyń tizimin jasap, jarııalaıdy. Qajet bolǵan jaǵdaıda ınjenerlik kommýnıkatsııalardy júrgizý jaǵyn da qamtamasyz etedi.
- Qurylys salýshy menshik ıesimen kelissóz júrgizip, ýaqytsha turǵyn úımen qamtamasyz etip nemese ony jalǵa alýǵa jumsalǵan shyǵyndy óteıdi. Sondaı-aq jyljymaıtyn múlikti baǵalap baryp tolyq satyp alýǵa bolady. Barlyq menshik ıesiniń kelisimi alynǵan soń, QTK kepildik berý týraly shartqa qosylyp, kepildik jaǵdaıy týyndaǵan kezde qurylys jumysyn aıaqtaý boıynsha mindettemeni óz moınyna alady, – deıdi spıker.
Menshik ıeleri úshin renovatsııa aıasynda turǵyn úı qurylysyna úlestik qatysý týraly shart jasasý qarastyrylǵan. Shart «Qazreestr» aqparattyq júıesinde mindetti túrde tirkeledi.
- Bul tetiktiń engizilýi apatty jáne tozyǵy jetken turǵyn úıdiń turǵyndarynyń qorǵalý deńgeıin arttyryp, renovatsııa jobasyna jeke ınvestıtsııa tartyp, turǵyn úı qoryn zamandyq standart pen jaıly ómir súrýge qolaıly ete otyryp jańartýǵa múmkindik bermek, - dedi ol.
Sózinshe, úleskerler úshin ekinshi deńgeıli bankterden salynyp jatqan turǵyn úıge ıpotekalyq qarjylandyrý tartý múmkindigi de qarastyrylǵan.
Qurylys jumysynyń keshendi sıpatyna da erekshe kóńil bólinedi. QTK tıisti jobalardy jeńildetilgen shartpen qarjylandyrady. Turǵyn úıdiń jalpy alańy keminde 10 myń sharshy metr bolýy tıis. Sondaı-aq jaıaý qoljetimdi jerde mektep, emhana men balabaqshanyń bolýy jáne bekitilgen josparlaý jobasyna sáıkes kelýi qajet.
Eske salsaq, Almaty azamattardy tirkeý úshin turǵyn úı kólemi standartyn belgilegen edi.
