Almatyda eski kólikterdiń ortalyqqa kirýine shekteý qoıylady
ALMATY. KAZINFORM - Almatyda aýany tazartýdyń jańa erejeleri ázirlenip jatyr. Qalada tómen ekologııalyq klasty kólikterge (Evro-5-ten tómen) ortalyqqa kirýge shekteý qoıylady. Bul bastama «Ashyq NQA» saıtynda qoǵamdyq talqylaýǵa shyǵaryldy.
Ákimdiktiń habarlaýynsha, mundaı kólikterdiń ortalyqqa kirýi aqyly bolýy múmkin, al tumsha kezinde múldem tyıym salynýy yqtımal. Tólem avtokóliktiń aımaqta júrgen ýaqytyna qaraı esepteledi.
Sonymen qatar qala ákimdigi eski kólik ıelerine olardy memleketke ótkizip, ýtılızatsııalaýǵa múmkindik usynbaq. Baǵdarlamaǵa 2025 jylǵy 1 qyrkúıekke deıin Almatyda tirkelgen avtokólikter qatysady.
– Almatyda 2025 jylǵy 1 qyrkúıekke deıin tirkelgen avtokólikterdi keıin ýtılızatsııalaý úshin satyp alý qarastyrylyp otyr. Baǵdarlama aıasynda tómen ekologııalyq klasqa jatatyn kólikterdi satyp alý shyǵyndary aımaqqa kirý tóleminen túsken qarajat esebinen, sondaı-aq óndirýshiler men ımporttaýshylardyń keńeıtilgen mindettemelerin oryndaýshy operatordyń jáne jergilikti bıýdjettiń qarjysy esebinen óteledi, - dep habarlady ákimdik.
Jańa erejelerdiń taǵy bir baǵyty – tómen shyǵaryndylar aımaqtaryn (LEZ) engizý. Áýeli pılottyq joba 2025 jylǵy 1 qazannan bastap ortalyqta iske qosylady, keıin 2026 jyly keńeıtilip, 2027 jyldan bastap búkil qalany qamtıdy.
Ekologtardyń pikirinshe, Almatydaǵy eski kólikterdi birtindep aınalymnan shyǵarý aýa sapasyn aıtarlyqtaı jaqsartyp, tumsha deńgeıin tómendetedi.
– Almatyda Pareto zańy jumys isteıdi. Eski avtokólikterdiń shamamen 20%-y búkil zııandy shyǵaryndylardyń basym bóligin (80%-ǵa jýyǵyn) týdyryp otyr. Sondyqtan dál osy kólikterdi kezeń-kezeńimen aınalymnan shyǵarý aýa sapasyn aıtarlyqtaı jaqsartady, - deıdi Almaty Air Initiative qorynyń atqarýshy dırektory Juldyz Sáýlebekova.
Eske salaıyq, buǵan deıin Almatyda otshashýǵa tyıym salynyp, avtokólikter úshin aqyly aımaqtar engizilýi múmkin ekenin jazǵan edik.