Almatyda eski kólikterdi satyp alý baǵdarlamasy týraly ne belgili
ALMATY. KAZINFORM – Almatyda ekologııalyq jaǵdaıdy jaqsartýǵa baǵyttalǵan sheshimder talqylanyp keledi. Olardyń biri - eski kólikterdi satyp alý.
Almaty ákimdigi bıyl sáýir aıynda ekologııalyq klasy tómen eski avtokólikterdi satyp alyp, keıin olardy kádege jaratý úshin arnaıy kompanııa qurý máselesi qarastyrylyp jatqanyn habarlady.
Qaladaǵy eski kólikterdiń úlesin azaıtýǵa múmkindik beretin baǵdarlama almatylyqtar arasynda qyzyǵýshylyq týrdyrdy.
Osy oraıda, Kazinform atalǵan jobanyń qandaı satyda ekenin naqtylaý úshin tıisti organdarǵa saýal joldady.
Almaty qalasy Ekologııa jáne qorshaǵan orta basqarmasynyń ókilderi eski kólikterdi satyp alý tetigi atmosferalyq aýa sapasyn jaqsartý jónindegi 2026 — 2027 jyldarǵa arnalǵan is-sharalar josparyna engenin atap ótti.
— Almaty qalasynyń atmosferalyq aýasyn qorǵaý qaǵıdalaryn iske asyrý sheńberinde «Almaty» Áleýmettik-kásipkerlik korporatsııasy» AQ 2026–2028 jyldarǵa arnalǵan avtokólik quraldaryn kádege jaratý jónindegi óńirlik baǵdarlamasynyń jobasyn ázirledi. Búgingi tańda baǵdarlama pysyqtaý satysynda, — dep habarlady basqarmadan.
Al «Almaty» Áleýmettik-kásipkerlik korporatsııasy» AQ baǵdarlamaǵa qatysty túsinikteme berip, onyń maqsaty men mindetin aıqyndady.
— Almatyda aýanyń lastanýyna avtokólikterden shyǵatyn zııandy zattar eleýli áser etedi. Sondyqtan ekologııalyq talaptarǵa saı kelmeıtin eski kólikterdi satyp alyp, keıin kádege jaratý tetigin engizý josparlanyp otyr. Mundaı sharalar kólikti jańartýǵa yntalandyryp, eski avtokólikterdiń sanyn azaıtýǵa múmkindik beredi. Bul óz kezeginde atmosferaǵa taraıtyn zııandy zattardyń kólemin tómendetýge yqpal etedi, — dep túsindirdi «Almaty» ÁKK».
Kompanııa málimetinshe, qazirgi ýaqytta baǵdarlama daıyndyq kezeńinde jáne ony iske asyrý tetigi ázirlenip jatyr. Ázirge oǵan qatystý sharttary, iske asyrý tártibi jáne baǵalaý júıesi naqtylanbaǵan. Alaıda baǵdarlama halyqtan avtokólikterdi tikeleı satyp alýdy kózdemeıdi. Onyń ornyna saýdaǵa avtodılerler men otandyq avtoóndirýshiler tartylady.
— Qazirgi ýaqytta avtodılerler men avtokólik óndirýshilerin jeńildikpen qarjylandyrý tetigi qarastyrylý ústinde. Soǵan sáıkes, ekologııalyq klasy tómen avtokólik ıelerine jańa avtokólik satyp alý kezinde jeńildik sertıfıkattaryn berý kózdeledi, — delingen jaýapta.
Eske salaıyq, 2026-2028 jyldarǵa arnalǵan qorshaǵan ortany qorǵaý jónindegi is-sharalar jospary 9 baǵyt boıynsha 43 is-sharany qamtıdy. Onyń ishinde 17 is-shara atmosferalyq aýanyń sapasyn jaqsartýǵa baǵyttalǵan.
Jospardyń basty ereksheligi — aýany lastaıtyn bir ǵana baǵytpen emes, energetıka, jeke sektor, avtokólik jáne óndiris kásiporyndary sekildi barlyq máselelerge bir mezgilde yqpal etedi.
Qujatta kórsetilgen negizgi jumystar:
— JEO-2 jáne JEO-3 nysandaryn gazǵa aýystyrý;
— Atmosferalyq aýany qorǵaý qaǵıdalaryn iske asyrý;
— Avtokólikterdiń tútindigi men otalýyna turaqty monıtorıng júrgizý;
— Tómen emıssııalyq aımaqtardy (LEZ) engizý;
— Ekologııalyq talaptarǵa sáıkes kelmeıtin kólikterdi kezeń-kezeńmen qysqartý;
— Ekologııalyq reıdterdi ótkizý jáne t. b.
Atalǵan jospar nátıjesinde 2028 jyldyń sońyna deıin Almatyda aýany lastaný deńgeıin kem degende 20%-ǵa deıin tómendetý josparlanǵan.
QR Ónerkásip jáne qurylys mınıstrliginiń málimetinshe, bıyl eldegi avtokólikter sany 5,9 mln bolsa, onyń 1,4 mıllıony — 10-20 jyl aralyǵyndaǵy, 2,4 mıllıony 20 jyldan asqan avtokólikter.
